ৰাষ্ট্ৰীয় নিৰাপত্তাৰ প্ৰতি ভাবুকি: দেশত বন্ধ কৰা হৈছে ১০৪ টা ইউটিউব চেনেল

ভুল তথ্য প্ৰচাৰ আৰু ৰাষ্ট্ৰীয় নিৰাপত্তাৰ প্ৰতি ভাবুকি কঢ়িয়াই অনাৰ বাবে ১০৪ টা ইউটিউব চেনেল দেশত বন্ধ কৰা হৈছে। লগতে একটা কৰাণতে ৪৫ টা ভিডিঅ’, ৪ টা ফেচবুক একাউণ্ট, তিনিটা ইনষ্টাগ্ৰাম একাউণ্ট, ৫ টা টুইটাৰ হেণ্ডেল আৰু ৬ টা ৱেবছাইটো বন্ধ কৰি দিয়া হৈছে।

কেন্দ্ৰীয় মন্ত্ৰী অনুৰাগ ঠাকুৰে বৃহস্পতিবাৰে সংসদত এই তথ্য দাঙি ধৰে। ৰাজ্যসভাত উত্থাপিত এক প্ৰশ্নৰ উত্তৰত ঠাকুৰে কেন্দ্ৰীয় চৰকাৰে গ্ৰহণ কৰা এই পদক্ষেপৰ বিষয়ে সদৰী কৰে।

ঠাকুৰে কয় যে তথ্য প্ৰযুক্তি আইনৰ ৬৯ এ ধাৰাত ভাৰতৰ সাৰ্বভৌমত্ব বা অখণ্ডতা, ভাৰতৰ প্ৰতিৰক্ষা, ৰাজ্যৰ সুৰক্ষা, বিদেশৰ সৈতে বন্ধুত্বপূৰ্ণ সম্পৰ্কৰ স্বাৰ্থত ডিজিটেল মাধ্যমৰ জৰিয়তে কোনো অপৰাধ সংঘটিত কৰিবলৈ উচটনি দিয়া বিষয়বস্তু ব্লক কৰাৰ ব্যৱস্থা আছে।

আই টি নিয়মৰ দ্বিতীয় খণ্ডৰ বিধান অনুসৰি ইলেক্ট্ৰনিকছ আৰু তথ্য প্ৰযুক্তি মন্ত্ৰালয়ে ২০২১ চনৰ পৰা চলিত বৰ্ষৰ অক্টোবৰলৈকে ছ’চিয়েল মিডিয়া প্লেটফৰ্মত ৱেবপেজ, ৱেবছাইট, পোষ্ট আৰু একাউণ্টকে ধৰি ১,৬৪৩টা ইউ.আৰ.এল ব্লক কৰাৰ নিৰ্দেশনা জাৰি কৰিছে বুলি অনুৰাগ ঠাকুৰে সদৰী কৰে।

চৰকাৰে তথ্য প্ৰযুক্তি আইনৰ নিয়মৰ অধীনত এই কঠোৰ ব্যৱস্থা গ্ৰহণ কৰিছে আৰু প্ৰয়োজন হ’লে ভৱিষ্যতেও এনে ব্যৱস্থা গ্ৰহণ কৰিবলৈ চৰকাৰে কুণ্ঠাবোধ নকৰে বুলি ঠাকুৰে লগতে কয়।