উত্তৰ প্ৰদেশত বন্ধ হ’ব ১০৯ বছৰীয়া ঐতিহাসিক পুৰণি ৰেইল লাইন

অতি শীঘ্ৰেই বন্ধ হ’ব উত্তৰ প্ৰদেশৰ দুধৱা ৰাষ্ট্ৰীয় উদ্যানৰ অন্তৰ্ভাগেৰে যোৱা ১০৯ বছৰীয়া ঐতিহাসিক মিটাৰগজ ৰেইল লাইন।

দধুৱা ৰাষ্ট্ৰীয় উদ্যানৰ মাজেৰে পাৰ হৈ যোৱা মিটাৰগজ ৰেইল পথছোৱা উদ্যানখনৰ জীৱ-জন্তুৰ সুৰক্ষাৰ স্বাৰ্থত বন্ধ কৰিবলৈ ন্যায়ালয়ে ৰেইল বিভাগক নিদেৰ্শ দিছিল।

ন্যায়ালয়ৰ উক্ত নিৰ্দেশনাৰ ভিত্তিত ৰেইল বিভাগে লখিমপুৰ-মেইলানী সংযোগী ব্ৰডগজ ৰেইল পথছোৱা নিৰ্মাণ কৰি উলিয়াইছে।

ৰেইল বিভাগৰ সূত্ৰই প্ৰকাশ কৰা অনুসৰি ১৭১ কিলোমিটাৰ দৈৰ্ঘ্যৰ নানপাৰা আৰু মেইলানী সংযোগী মিটাৰগজ ৰেইল পথছোৱা দুধৱা ৰাষ্ট্ৰীয় উদ্যানৰ মাজেৰে পাৰ হৈ গৈছিল।

ৰে’লৱেই কৰ্তৃপক্ষই জনাইছে যে চলিত মাহত লখিমপুৰ-মেইলানী সংযোগী ব্ৰডগজ ৰে’লৱেই লাইন মুকলি কৰাৰ লগে লগেই বন্ধ কৰা হ’ব ১০৯ বছৰীয়া পুৰণি ঐতিসাহিক মিটাৰগজ ৰেইল পথছোৱা।

ইফালে বন্ধ কৰাৰ পিছত উক্ত মিটাৰগজ ৰেইল লাইনটো “ঐতিহ্য চিহ্ন”ৰূপে সংৰক্ষণ কৰি ৰখা হ’ব বুলি জনাইছে ৰে’লেৱই কৰ্তৃপক্ষই।

দুধৱা ব্যাঘ্ৰ্য সংৰক্ষণৰ পৰিচালক সঞ্জয় পাঠকে কয় যে “যোৱা ২০ বছৰত প্ৰায় ১০০ টা জন্তু ৰেইল দুৰ্ঘটনাত মৃত্যু ঘটিছে। তাৰ ভিতৰত হৰিণ, বাঘ, হাতী, গঁড় আৰু ঘৰিয়াল অন্যতম।”

উল্লেখ্য যে উক্ত মিটাৰগজ ৰেইল লাইন বন্ধ কৰি দিয়াৰ ফলত নানপাৰা আৰু মেইলানীৰ প্ৰায় ৩০ লক্ষাধিক লোকৰ দৈনিক যাতায়াতৰ ওপৰত বিৰূপ প্ৰভাৱ পৰিব। কাৰণ এই অঞ্চলৰ লোকসকলৰ বৰ্হিবিশ্বৰ সৈতে যোগাযোগৰ একমাত্ৰ সম্বল হ’ল ৰেইল যাতায়াত।

উত্তৰ পূৱ ৰে’লৱেৰ জনসম্পৰ্কৰক্ষী বিষয়া পংকজ সিঙে কয় যে নৱনিৰ্মিত দধুৱা ব্ৰডগজ ৰে’লৱে লাইনছোৱাৰ নিৰ্মাণ সম্পূৰ্ণ হৈ উঠিছে।

জনসম্পৰ্কৰক্ষী বিষয়াগৰাকীয়ে লগতে আৰু কয় যে বহ্রাইখ হৈ গন্দা-মেইলানী ৰেইল লাইনটো ১৯১১ চনতে শুভাৰম্ভ কৰা হৈছিল।ইফালে তাৰ পূৰ্বে ১৮৯২ চনত মেইলানী-চ’হেলা আৰু চ’হেলা-সোণাৰীপুৰ শাখাৰ ৰেইল লাইন সম্পূৰ্ণ হৈছিল ১৮৯৮ চনত। আনহাতে নানপাৰা-মিহিনপোৱা ৰেইল পথছোৱা সম্পূৰ্ণ কৰা হৈছিল ১৮৯২ আৰু মিহিনপোৱা-কাটাৰ্নিয়া ৰেইল পথছোৱা সম্পূৰ্ণ কৰা হৈছিল ১৮৯৮ চনত।

“সোণাৰীপুৰ-ক’দীয়ালঘাট ৰেইল পথছোৱা ১৯১১ চনত সম্পূৰ্ণ কৰাৰ পিছত কাটাৰ্নিয়াঘাট আৰু ক’লদীয়াঘাট শাখা ১৯৪৬ চনত সম্পূৰ্ণ কৰি যাতায়াত আৰম্ভ কৰা হৈছিল” বুলিও বিষয়া সিঙে জানিবলৈ দিয়ে।