গৰুৰ বজাৰত উন্মত্ত জনতা ভেদি উদ্ধাৰ ৪ ব্যক্তিক, হাইলাকান্দি আৰক্ষীৰ ১২জন ঘায়েল, অ’চিৰ অৱস্থা গুৰুতৰ

হাইলাকান্দি আৰক্ষীৰ এটা দলে শুকুৰবাৰে ৰাতি এখন গৰু বজাৰত উন্মত্ত দলবদ্ধ জনতাৰ আক্ৰমণ ভেদি চাৰিজন লোকৰ প্ৰাণ ৰক্ষা কৰিছে।

আৰক্ষী সূত্ৰমতে, জিলাখনৰ নিতাইনগৰ গাঁৱত সংঘটিত ঘটনাটোত ঘায়েল হৈছে তেওঁলোকৰ ১২জন ব্যক্তি।

লাঠী লৈ চলা দলবদ্ধ আক্ৰমণৰ বলি হাইলাকান্দি সদৰ থানাৰ ভাৰপ্ৰাপ্ত বিষয়া হেমন্ত কুমাৰ দাস, চেকেণ্ড অফিচাৰ অশোক চক্ৰবৰ্তী, আলগাপুৰ আৰক্ষী চকীৰ অ’চি বৰাত চন্দ্ৰ কৰ আৰু চি আৰ পি এফৰ দুজন জোৱানৰ আঘাত গুৰুতৰ, সূত্ৰটোৱে জনায়।

খবৰমতে, নিতাইনগৰ বজাৰৰ লস্কৰবজাৰ সাপ্তাহিক গৰু হাটলৈ যোৱা আৰক্ষী কনিষ্টবল জামিল হুছেইনকে ধৰি নজনীয়া দল এটাক সোপাধৰা বুলি কোনো লোকে আক্ৰমণ আৰম্ভ কৰে।

“শিশু সোপাধৰা” ধৰাৰ খবৰটো তৎক্ষণাত বনজুইৰ বিয়পি যায় আৰু আক্ৰমণকাৰী উত্তেজিতসকলে ব্যক্তিকেইজনক প্ৰচণ্ড মাৰ সোধোৱাৰ লগতে তেওঁলোক যোৱা গাড়ীও জ্বলাই দিয়ে।

খবৰ পাই ঘটনাস্থলীত উপস্থিত হোৱা হাইলাকান্দি সদৰ আৰক্ষী-চি আৰ পি এফ দলটোকো উত্তেজিত লোকসকলে আক্ৰমণ কৰে।

আক্ৰমণত বাধা দিয়া, ঘটনাস্থলীত উপস্থিত আন কেইজনমান অসামৰিক লোকো ঘটনাটোত আঘাতপ্ৰাপ্ত হৈছে।

অ’চি দাসৰ আঘাত গুৰুতৰ আৰু তেওঁক ৰাতিয়ে শিলচৰ চিকিৎসা মহাবিদ্যালয় আৰু চিকিৎসালয়ত ভৰ্তি কৰা হয়।

ঘটনাটোৰ পিছত ঠাইখিনিলৈ পুনৰ স্বাভাৱিক পৰিস্থিতি ঘূৰি আহিছে।

আৰক্ষীয়ে ইতিমধ্যে ঘটনাটোৰ তদন্ত আৰম্ভ কৰিছে।

ইফালে, জিলা উপায়ুক্ত কীৰ্তি জালিয়ে ৰাইজক শান্ত হৈ থাকিবলৈ আহ্বান জনাইছে আৰু সোপাধৰাৰ কোনো দলৰ উপস্থিতি অগ্ৰাহ্য কৰিছে।