উপৰ্যুপৰি গণধৰ্ষণ কৰি জ্বলালে ১২ বছৰীয়া কিশোৰীক : চাৰি অভিযুক্ত গ্ৰেপ্তাৰ আৰক্ষীৰ

গণধৰ্ষণ আৰু গণধৰ্ষণৰ পিছত নিৰ্যাতিতাক জীৱন্ত অৱস্থাতে জ্বলাই হত্যা কৰাৰ দৰে এক লোমহৰ্ষক ঘটনা পোহৰলৈ আহিছে।

ঘটনাটো সংঘটিত হৈছে বিহাৰৰ মুজাফাৰপুৰত।

যোৱা মংগলবাৰে নিৰ্যাতিতা কিশোৰীগৰাকীৰ পিতৃয়ে আৰক্ষী থানাত অভিযোগ দাখিল কৰাৰ পিছতহে এই লোমহৰ্ষক ঘটনাটো পোহৰলৈ আহে।

আৰক্ষীয়ে প্ৰকাশ কৰা ঘটনাৰ বিৱৰণী অনুসৰি নিৰ্যাতিতা পিতৃ দৈনিক মজুৰিপ্ৰাপ্ত শ্ৰমিক হিচাপে পঞ্জাৱত কৰ্মৰত আছিল।

যোৱা বছৰৰ ২৩ ডিচেম্বৰত নিৰ্যাতিতাৰ গৃহত বলপূৰ্বকভাৱে প্ৰৱেশ কৰি গাঁৱৰ চাৰিজন লোকে ১২ বছৰীয়া কিশোৰীগৰাকীক গণধৰ্ষণ কৰাৰ লগতে সেই কাৰ্যৰ ভিডিঅ’ ৰেকডিঙো কৰে।

উক্ত ৰেকৰ্ডিং ভিডিঅ’ৰে কিশোৰীগৰাকীক ব্লেকমেইল কৰি লোককেইজনে পুনৰ গণধৰ্ষণ কৰি আহিছিল।

কিন্তু যোৱা ৩ জানুৱাৰীত অভিযুক্তকেইজনে পুনৰ নিৰ্যাতিতা কিশোৰীগৰাকীৰ গৃহত বলপূৰ্বকভাৱে প্ৰৱেশ কৰি কিশোৰীগৰাকীক ধৰ্ষণ কৰাৰ লগতে হত্যা কৰি জ্বলাই দিয়ে।

কিশোৰীগৰাকীৰ পিতৃয়ে আৰক্ষীৰ আগত অভিযোগ কৰাৰ মতে জ্বলোৱাৰ সময়ত কিশোৰীগৰাকীয়ে স্বাস-প্ৰশ্বাস লৈ আছিল।

এই সমস্ত ঘটনাৰ প্ৰত্যক্ষদৰ্শী আছিল কিশোৰীগৰাকীৰ জ্যেষ্ঠ ভগ্নী। নিৰ্যাতিতাগৰাকীৰ জ্যেষ্ঠ ভগ্নীয়ে সমস্ত ঘটনা পঞ্জাৱত কৰ্মৰত পিতৃক অৱগত কৰে।

ঘটনাৰ খবৰ পায়ে পিতৃয়ে ঘৰলৈ ওভতি আহি যোৱা মংগলবাৰে আৰক্ষী থানাত চাৰি অভিযুক্তৰ বিৰুদ্ধে এজাহাৰ দাখিল কৰে।

উক্ত এজাহাৰ ভিত্তিত আৰক্ষীয়ে চাৰি অভিযুক্তক পস্কো আইনৰ অধীনত গ্ৰেপ্তাৰ কৰিছে।