এ পি এছ চিৰ কেলেংকাৰি : এইবাৰ দালাল চক্ৰৰ বিৰুদ্ধে চলিছে অভিযান
সমগ্ৰ ৰাজ্যতে চাঞ্চল্যৰ সৃষ্টি কৰা অসম লোকসেৱা আয়োগৰ ধনৰ বিনিময়ত চাকৰি কেলেংকাৰিৰ তদন্ত কৰি থকা আৰক্ষী গোটে এইবাৰ এই কেলেংকাৰিটোত মধ্যস্থতাকাৰী দালালৰ বিৰুদ্ধে অভিযান চলোৱাৰ প্ৰস্তুতি চলাইছে।
জানিব পৰামতে অচিৰেই এই কেলেংকাৰিত দালালৰ ভূমিকাৰে চাকৰি কিনা আৰু বেচা পক্ষকেইটাক সহায় কৰা কেইবাজনো ব্যক্তিৰ তালিকা ইতিমধ্যে তদন্তকাৰী আৰক্ষীয়ে সাজু কৰিছে।
উল্লেখযোগ্য যে চাঞ্চল্যৰ সৃষ্টি কৰা এ পি এছ চিৰ কেলেংকাৰিত ইতিপূৰ্বে দুই ডজনৰো অধিক বিষয়া গ্ৰেপ্তাৰ হোৱাৰ লগতে ইয়াৰ মূল হোতা তথা অসম লোকসেৱা আয়োগৰ প্ৰাক্তন অধ্যক্ষ ৰাকেশ পালো বৰ্তমান এই কেলেংকাৰিত অভিযুক্ত হৈ জেইলত আছে।
আৰক্ষীৰ সূত্ৰটোৱে জনোৱা মতে, অসম লোকসেৱা আয়োগৰ চাকৰি লোৱা আৰু দিয়া পক্ষকেইটাৰ মাজত টকা-পাইচাৰ লেনদেনত ভূমিকা লোৱা তথা চাকৰি কিনা প্ৰাৰ্থী যোগাৰ কৰা, আদি ভূমিকাত থকা অতি কমেও ১০জন ব্যক্তিৰ বিষয়ে আৰক্ষী অৱগত হৈছে। ইয়াৰে দুজনক ইতিমধ্যে গ্ৰেপ্তাৰ কৰাৰ লগতে আন ৬জনৰ সন্ধানত আছে। ইয়াৰে ৪জনক ইতিমধ্যে পলাতক ঘোষণা কৰা হৈছে।
সূত্ৰটোৱে জনোৱামতে এই দালালকেইজনৰ মাজেৰেই প্ৰাক্তন অধ্যক্ষ ৰাকেশ পাল, তেওঁৰ এই কেলেংকাৰিৰ সহযোগী বসন্ত কুমাৰ দলে আৰু ছামেদুৰ ৰহমানে ধন সংগ্ৰহ কৰিছিল। আৰক্ষীয়ে জানিবলৈ দিয়া মতে, দালালকেইজনে প্ৰাৰম্ভিক পৰীক্ষাৰ পূৰ্বেই লক্ষ্য প্ৰাৰ্থীসকলৰ সৈতে যোগাযোগ কৰিছিল। সন্মত হোৱা প্ৰাৰ্থীৰ পৰা কিস্তি হিচাপত ধন উঠাইছিল এওঁলোকে।