ভোকাতুৰ প্ৰতিবাদকাৰীলৈ ১৫০ খন পিজ্জা, নাগালেণ্ডৰ যুৱকৰ মানৱীয়তাই চুই গ’ল দেশবাসীৰ মন

নতুন দিল্লীৰ যন্তৰ মন্তৰত ককৰোচ জনতা পাৰ্টী চমুকৈ চি জে পিৰ প্ৰতিবাদত অংশগ্ৰহণ কৰা প্ৰতিবাদকাৰীসকলৰ বাবে ১৫০ খন পিজ্জা পঠিয়াই ছচিয়েল মিডিয়াত চৰ্চাৰ কেন্দ্ৰবিন্দু হৈ পৰিছে নাগালেণ্ডৰ এজন যুৱক। সমগ্ৰ দেশৰ পৰা এই প্ৰতিবাদত অংশগ্ৰহণ কৰিবলৈ অহা লোকসকলক সহায় কৰাৰ উদ্দেশ্যে তেওঁ এই পদক্ষেপ গ্ৰহণ কৰে। উল্লেখযোগ্য যে নিট পৰীক্ষাৰ প্ৰশ্নকাকত ফাদিল আৰু শৈক্ষিক সংস্কাৰৰ দাবীত শিক্ষাৰ্থী আৰু সমৰ্থকসকলে চৰকাৰৰ পৰা উত্তৰ বিচৰাৰ লগতে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগ দাবী কৰি এই প্ৰতিবাদ সাব্যস্ত কৰিছে।

ইনষ্টাগ্ৰামৰ এটি পোষ্টত ঝা লহৌ নামৰ যুৱকজনে প্ৰকাশ কৰে যে তেওঁ দিল্লীলৈ যাবলৈ অসমৰ্থ আছিল যদিও অন্য ধৰণে এই প্ৰতিবাদলৈ বৰঙণি আগবঢ়াব বিচাৰিছিল। তেওঁ লিখিছে যে প্ৰতিবাদস্থলীত উপস্থিত থাকিব নোৱাৰাৰ দুখত আৰু নিজৰ ভাই-ভনীসকলে তাত ভোকত থকাৰ কথা ভাবি তেওঁ ৰাতিৰ আহাৰ গ্ৰহণ কৰিব পৰা নাছিল। সেয়েহে তেওঁ ১৫০ খন ডমিনজ ফাৰ্মহাউচ চিজ বাৰ্ষ্ট পিজ্জা অৰ্ডাৰ কৰে আৰু ডেলিভাৰী বয়জনক যিসকল প্ৰতিবাদকাৰীয়ে একো খোৱা নাই তেওঁলোকৰ মাজত বিতৰণ কৰিবলৈ অনুৰোধ জনায়।

যুৱকজনে জানিবলৈ দিয়া মতে ডেলিভাৰী বয়জনে যেতিয়া তেওঁক ফোন কৰি সুধিছিল যে এই পিজ্জাখিনি কাক দিব লাগিব, তেতিয়া তেওঁ উত্তৰ দিছিল যে যিয়ে একো খোৱা নাই তেওঁলোকক এইখিনি দি দিয়ক। পোষ্টটোৰ অনুসৰি ডেলিভাৰী বয়জনে পিছত তেওঁক কৈছিল যে আপুনি সেই মানুহখিনিৰ বাবে ভগৱান স্বৰূপ। লহৌৱে কয় যে এই কথাষাৰে তেওঁক উপলব্ধি কৰোৱায় যে প্ৰতিবাদস্থলীত উপস্থিত নথকা বহুতো লোকৰ হৃদয়তো এই প্ৰতিবাদে স্পৰ্শ কৰিছে। তেওঁ স্পষ্ট কৰি দিয়ে যে এই পোষ্টটোৰ উদ্দেশ্য নিজকে প্ৰদৰ্শন কৰা নহয়, বৰঞ্চ আনকো সহায় কৰিবলৈ অনুপ্ৰাণিত কৰাহে। দিল্লীত উপস্থিত নাথাকিলেও যে সহায় কৰিব পাৰি, সেই কথা মানুহক বুজাবলৈকে তেওঁ এই পোষ্টটো কৰিছে। লগতে তেওঁ নাগালেণ্ড, উত্তৰ-পূৰ্বাঞ্চল আৰু দেশৰ আন প্ৰান্তৰ লোকসকলকো সক্ষমতা অনুসৰি খাদ্য পঠিয়াই প্ৰতিবাদকাৰীসকলক সহায় কৰিবলৈ আহ্বান জনায়। ছচিয়েল মিডিয়াত এই পোষ্টটোৱে ব্যাপক চৰ্চা লাভ কৰিছে আৰু বহুতে যুৱকজনৰ এই কাৰ্যক প্ৰতিবাদকাৰীসকলৰ প্ৰতি থকা এক গভীৰ সমৰ্থন বুলি প্ৰশংসা কৰিছে।