নেপালত বান আৰু ভূমিস্খলনৰ তাণ্ডৱত ১৮ জন লোকৰ মৃত্যু; ২৪ জন নিৰুদ্দেশ
ক’ৰ’না সন্ত্ৰাসৰ মাজতে বানপানী আৰু ভূমিস্খলনে তীব্ৰ ৰূপ ধাৰণ কৰিছে নেপালত। ইয়াৰ ফলত দেশখনত এতিয়ালৈকে ১৮ গৰাকী লোকৰ মৃত্যু হৈছে।
এই প্ৰাকৃতিক দুৰ্যোগৰ ফলত দেশখনৰ বেলেগ বেলেগ অঞ্চলৰ পৰা ২৪ গৰাকী লোক নিৰুদ্দিষ্ট হৈ থকা বুলি চৰকাৰী তথ্যত প্ৰকাশ পাইছে।
দেশখনৰ কাস্কী, পোখৰা, চৰংগকোট, হেমজন, লামজুং আৰু আঠবিস্কোটত ভয়ংকৰ ভূমিস্খলন হোৱা বুলি জানিব পৰা যায়।
ধাৰসাৰ বৰষুণৰ ফলত হোৱা বান আৰু ভূমিস্খলনে নেপাল আৰু চীনৰ টটোপানী-ঝংমু ব’ৰ্ডাৰ পইণ্ট সংযোগী পথছোৱাও ক্ষতিগ্ৰস্ত কৰিছে।
সিন্ধুপালচ’ক জিলা প্ৰশাসন কাৰ্যালয়ৰ মুখ্য জিলা অধিকাৰী উমেশ কুমাৰ ঢকালে এটা নিউজ এজেন্সিক দিয়া তথ্য মতে বৰহাবিছে নগৰ পালিকাৰ অন্তৰ্গত ১১ টা ঘৰ উটি যোৱাত ১৪ গৰাকী লোক নিৰুদ্দেশ হৈছে। তদুপৰি ৩ গৰাকী লোক আঘাতো হয়।
ইফালে ভোটেকোশী নগৰ পালিকাৰ দুটা ঘৰ উটি যোৱাত চাৰিগৰাকী লোক নিৰুদ্দেশ আৰু দুজন লোক আঘাতপ্ৰাপ্ত হয়।
তেওঁ লগতে কয় যে ৰাজধানী কাঠমাণ্ডুক নেপাল-চীন ব’ৰ্ডাৰ পইণ্টক সংযোগ কৰা অৰানিকো ৰাষ্ট্ৰীয় ঘাইপথছোৱাৰ কমেও ৭ টা মান অঞ্চলত ভতিগ্ৰস্ত হৈছে।
উল্লেখ্য যে নেপালৰ কোশী, গণ্ডক, নাৰায়ণীসহ প্ৰায়োৰ নদীয়ে বিপদসীমাৰ ওপৰেৰ বৈ আছে।