কোকৰাঝাৰৰ পৰিস্থিতিক লৈ হাগ্ৰামা মহিলাৰীৰ উদ্বেগ : শান্তি-শৃংখলাৰ স্বাৰ্থত ১৮ জনক আটক আৰক্ষীৰ

বড়োলেণ্ড পিপলছ ফ্ৰণ্টৰ মূৰব্বী হাগ্ৰামা মহিলাৰীয়ে কোকৰাঝাৰৰ শেহতীয়া ঘটনাক অতি দুৰ্ভাগ্যজনক বুলি অভিহিত কৰিছে। তেওঁ সমাজৰ সকলো শ্ৰেণীৰ লোককে শান্তি আৰু ধৈৰ্য বজাই ৰাখিবলৈ আন্তৰিক আহ্বান জনাইছে। মহিলাৰীয়ে কয় যে এক ভুল বুজাবুজিৰ বাবে এই পৰিস্থিতিৰ সৃষ্টি হৈছে আৰু কিছুমান তৃতীয় পক্ষই ইয়াৰ সুযোগ লৈ কথাটো অধিক জটিল কৰিবলৈ চেষ্টা কৰিছে। তেওঁ সাৱধান কৰি দিয়ে যে এনে কোনো অপচেষ্টা সফল হ’বলৈ দিয়া নহ’ব আৰু পৰিস্থিতি নিয়ন্ত্ৰণ কৰিবলৈ সকলোৱে দায়িত্ব ল’ব লাগিব।

প্ৰশাসনক আইন-শৃংখলাৰ ওপৰত তীক্ষ্ণ নজৰ ৰাখিবলৈ নিৰ্দেশ দি মহিলাৰীয়ে শান্তি ভংগ কৰা লোকসকলৰ বিৰুদ্ধে কঠোৰ ব্যৱস্থা ল’বলৈ কয়। তেওঁ ৰাইজক কোনো ধৰণৰ হিংসা বা উৰাবাতৰিত ভোল নাযাবলৈ আৰু অঞ্চলটোত স্বাভাৱিক অৱস্থা ঘূৰাই অনাৰ ক্ষেত্ৰত আৰক্ষী-প্ৰশাসনক সম্পূৰ্ণ সহায় কৰিবলৈ অনুৰোধ জনায়। তেওঁ স্পষ্ট কৰি দিয়ে যে শান্তি বিঘ্নিত কৰা কাৰ্যক কোনোমতে সহ্য কৰা নহ’ব।

আনহাতে কাৰিগাঁৱত সংঘটিত হোৱা গণপ্ৰহাৰৰ ঘটনাৰ সংক্ৰান্তত কোকৰাঝাৰ আৰক্ষীয়ে ইতিমধ্যে ১৮ জন লোকক আটক কৰিছে। প্ৰাথমিক প্ৰমাণ আৰু সাক্ষীৰ ভাষ্যৰ ভিত্তিত এই অভিযান চলোৱা হৈছে বুলি আৰক্ষীয়ে জনাইছে। আটক কৰা সকলৰ ভিতৰত আছে সত্যনাথ টুডু, গুডৰাই কিস্কু, গুণি মাৰ্ডি, পৱন হেমব্ৰম, মংগল মুৰ্মু, ৰাজু বাস্কি, সোণিৰাম মুৰ্মু, ৰবিন হেমব্ৰম, সোৱান মাৰ্ডি, ৰবিন চৰেন, ৰবি হাসদা, বেচিলিঅ’চ চৰেন, চাবাহ মুৰ্মু, নিকোলাছ চৰেন, সোমে হেমব্ৰম, চেবাচ হেমব্ৰম, সুনীল টুডু আৰু মুণ্টু মুৰ্মু।

আৰক্ষীৰ মতে এই ঘটনাৰ লগত জড়িত আন লোকসকলকো চিনাক্ত কৰাৰ বাবে তদন্ত প্ৰক্ৰিয়া অতি তীব্ৰগতিত চলি আছে। এই হিংসাত্মক ঘটনাই অঞ্চলটোত চেপা উত্তেজনাৰ সৃষ্টি কৰিছে যদিও আৰক্ষীয়ে পৰিস্থিতি নিয়ন্ত্ৰণত ৰাখিবলৈ চেষ্টা কৰিছে। তদন্তৰ অগ্ৰগতিৰ লগে লগে আৰু অধিক লোক গ্ৰেপ্তাৰ হোৱাৰ সম্ভাৱনা আছে। কাৰিগাঁও আৰু ইয়াৰ ওচৰ-পাজৰৰ অঞ্চলত শান্তি ঘূৰাই আনিবলৈ আৰক্ষীয়ে আইনী প্ৰক্ৰিয়া অব্যাহত ৰাখিছে।