পানী মিহলোৱা ডিজেল; পথৰ মাজতে বিকল হৈ পৰিল বিজেপিৰ মুখ্যমন্ত্ৰীৰ কনভয়ৰ ১৯খন বাহন

মধ্যপ্ৰদেশৰ মুখ্যমন্ত্ৰী মোহন যাদৱে এক অনুষ্ঠানত অংশগ্ৰহণ কৰিবলৈ গৈ আছিল। হঠাতে ঘটিল বিজুতি। ইখনৰ পিছত সিখন গাড়ী ৰৈ যাবলৈ ধৰিলে। এইদৰে কনভয়ৰ ১৯ খন বাহন পথৰ মাজতে বিকল হৈ পৰে।

শুকুৰবাৰে এই ঘটনাৰ বাবেই এক বৃহৎ কেলেংকাৰীৰ উন্মোচিত হয়। বাহনসমূহত পানী মিহলি ডিজেল ভৰোৱা হৈছিল হোৱা বুলি জানিব পৰা গৈছে। এই ঘটনাক লৈ ক্ষুব্ধ হৈ পৰিছে মুখ্যমন্ত্ৰী। বৃহৎ দুৰ্নীতিৰ অভিযোগত ছীল কৰা হৈছে পেট্ৰ’ল পাম্পটো।

জানিব পৰা মতে, শুকুৰবাৰে পুৱা মধ্যপ্ৰদেশৰ ৰাটলামত অনুষ্ঠিত হোৱা ‘এম পি ৰাইজ ২০২৫’ অনুষ্ঠানলৈ গৈ আছিল মুখ্যমন্ত্ৰীগৰাকী। সেই সময়ত বাটত পেট্ৰ’ল পাম্পৰ পৰা মুখ্যমন্ত্ৰীৰ কনভয়ৰ বাহনত ৩৫০ লিটাৰৰো অধিক ডিজেল ভৰাইছিল। অৱশ্যে কিছু দূৰ যোৱাৰ পিছত বাহনসমূহ নচলা হ’ল।

চালকসকলে কেনেবাকৈ গাড়ীবোৰ ঠেলি নিলে। ঘটনাস্থলীত উপস্থিত হয় প্ৰশাসনিক বিষয়া। ইন্ধন পৰীক্ষা কৰাৰ পিছত সন্দেহৰ সৃষ্টি হয়। যদিও পেট্ৰ’ল পাম্পৰ কৰ্মচাৰীয়ে বিষয়টো অস্বীকাৰ কৰে। পিছত ডিজেলৰ নমুনা সংগ্ৰহ কৰি তাত পানী মিহলি থকাটো ধৰা পৰে।

অভিযোগ পোৱাৰ পিছতে পেট্ৰ’ল পাম্পটো ছীল কৰি দিয়া হয়। বিতং প্ৰতিবেদন দাখিল কৰিব ৰাটলাম কালেক্টৰে। অৱশ্যে মুখ্যমন্ত্ৰীৰ অনুষ্ঠানত এই ঘটনাৰ কোনো প্ৰভাৱ পৰা নাছিল। মুখ্যমন্ত্ৰীৰ বাবে ইন্দোৰৰ পৰা আন এখন বাহনৰ ব্যৱস্থা কৰা হয়। এই ঘটনাৰ পিছতে পেট্ৰ’ল পাম্পত কেইবাজনো ট্ৰাক চালক উপস্থিত হৈ একে অভিযোগ উত্থাপন কৰে।