’৮৪ৰ শিখ গণহত্যা এৰাই চলিব পৰা গ’লহেঁতেন: মনমোহন সিং

ভাৰতৰ প্ৰাক্তন প্ৰধান মন্ত্ৰী মনমোহন সিঙে বুধবাৰে কৈছে যে তদানীন্তন গৃহ মন্ত্ৰী নৰ্সিমহা ৰাৱে ইন্দৰ কুমাৰ গুজৰালৰ পৰামৰ্শ মানি লোৱাহ’লে ১৯৮৪ৰ শিখ গণহত্যা হয়তো এৰাই চলিব পৰা গ’লহেঁতেন।

সিঙে কয় যে ইন্দিৰা গান্ধীক হত্যাৰ পিছতে “গুৰুতৰ” পৰিস্থিতি মোকাবিলাৰ বাবে গুজৰালে তদানীন্তন গৃহ মন্ত্ৰী ৰাওক যিমান পাৰি সোনকালে সেনা মোতায়েনৰ পৰামৰ্শ দিছিল।

“সেই পৰামৰ্শ মনা হ’লে হয়তো ১৯৮৪ত ঘটা গণহত্যা এৰাই চলিব পৰা গ’লহেঁতেন,” ভাৰতৰ প্ৰাক্তন প্ৰধান মন্ত্ৰী (১৯৯৭-৯৮)গুজৰালৰ এশ বছৰীয়া জন্ম জয়ন্তীৰ এক অনুষ্ঠানত প্ৰদান কৰা ভাষণত সিঙে কয়।

কিন্তু প্ৰাক্তন প্ৰধান মন্ত্ৰী ৰাওৰ পুত্ৰ, বিজেপি নেতা এন ভি সুভাষে সিঙৰ মন্তব্য “অগ্ৰহণযোগ্য” বুলি কৈছে। আৰু কৈছে মন্তব্যটোৱে তেওঁক “আঘাত” দিছে।

“গৃহ মন্ত্ৰী এজনে কেবিনেট অনুমোদন নোহোৱাকৈ স্বাধীনভাৱে সিদ্ধান্ত ল’ব পাৰেনে?” ইণ্ডিয়ান এক্সপ্ৰেছত সুভাষৰ উদ্ধৃতি।

শিখ গণহত্যাৰ বাবে সংসদ আৰু দেশবাসীক সিং আৰু কংগ্ৰেছ নেত্ৰী ছনিয়া গান্ধীয়ে পূৰ্বেও ক্ষমা খুজিছিল।

“অকল শিখ সম্প্ৰদায়কে নহয়, গোটেই দেশকে ক্ষমা খুজিবলৈ মোৰ অলপো সংকোচ নাইI মই মূৰ তল কৰো যে এনে ঘটনাও ঘটিছিল,” ২০০৫ চনত ৰাজ্য সভাত সিঙে কৈছিল।

ইন্দিৰা গান্ধীক তেওঁৰ চাৰিজন শিখ দেহৰক্ষীয়ে ১৯৮৪ চনত গুলীয়াই হত্যা কৰাৰ পিছত দেশ কঁপোৱা গণহত্যাটো সংঘটিত হৈছিল।

ৰাজধানী নতুন দিল্লীত ভয়ানক ৰূপ লোৱা এই গণহত্যাকাণ্ডত দেশজুৰি ৩০০০তকৈয়ো শিখ লোকক হত্যা কৰা হৈছিল।

বহুকেইজন কংগ্ৰেছ নেতা শিখ গণহত্যাত উন্নত্ত জনতাক নেতৃত্ব দিয়াৰ অভিযোগত অভিযুক্ত হৈছিল।