হাফলং-শিলচৰ পথত ভয়ংকৰ দুৰ্ঘটনাত পতিত গৃহৰক্ষী জোৱান কঢ়িওৱা বাছ; নিহত ১, আহত ৩২

হাফলং-শিলচৰ ৫৪নং ৰাষ্ট্ৰীয় ঘাইপথত সংঘটিত এক ভয়ংকৰ পথ দুৰ্ঘটনাত এজন লোক নিহত হোৱাৰ লগতে ৩২জন লোক আহত হোৱাৰ খৱৰ পোৱা গৈছে।

দ্বিতীয় পৰ্যায়ৰ নিৰ্বাচনৰ বাবে নিৰাপত্তাৰ দায়িত্বত থকা গৃহৰক্ষী বাহিনীৰ জোৱানক লৈ লখিমপুৰৰ পৰা হাইলাকান্দিলৈ গৈছিল বাছখন।

হাফলং-শিলচৰ ৫৪নং ৰাষ্ট্ৰীয় ঘাইপথত বাছখন নিয়ন্ত্ৰণ হেৰুৱাই পাহাৰৰ পৰা তলৰ খাৱৈত সৰি পৰে। দুৰ্ঘটনাটোত বাছখনৰ চালকজন থিতাতে নিহত হয়।

বাতৰি অনুসৰি সোমবাৰে দুপৰীয়া প্ৰায় ১বজাত গৃহৰক্ষী বাহিনীৰ জোৱান কঢ়িয়াই নিয়া বাছখন হাইলাকান্দিলৈ গৈ থকাৰ সময়তে পাহাৰীয়া পথত নিয়ন্ত্ৰণ হেৰুৱাই খাৱৈত পৰি যায়।

এই ভয়ংকৰ দুৰ্ঘটনাটোত বাছখনৰ চালকজনৰ মৃত্যু হোৱাৰ লগতে বাছখনৰ ৩২জন গৃহৰক্ষী জোৱান আহত হয়।

আহতসকলৰ ১৫জন জোৱান গুৰুতৰভাৱে আহত হয়।

ধুৰ্ঘটনাৰ খৱৰ পাই হাৰাংগাজাওৰ আৰক্ষী ঘটনাস্থলীত উপস্থিত হৈ আহত গৃহৰক্ষী জোৱানসকলক হাৰাংগাজাও প্ৰাথমিক স্বাস্থ্য কেন্দ্ৰলৈ লৈ আনে।

দুৰ্ঘটনাত গুৰুতৰভাৱে আহত ১৫জন জোৱানক হাফলং চৰকাৰী হাস্পাতললৈ প্ৰেৰণ কৰা হয়।