চৰকাৰৰ সন্মতি নোপোৱাকৈয়ে জোৰদাৰ প্ৰচাৰ চলিছে কোটি টকীয়া “ব্ৰহ্মপুত্ৰ পুষ্কৰমৰ”; ভক্তই বিচাৰিছে পঞ্চতাৰকা হোটেল
চৰকাৰে এতিয়ালৈকে সন্মতি দিয়া নাই যদিও অসমত থকা বহিৰাগত এশ্ৰেণী লোকৰ দ্বাৰা পূৰ্ণ্যোদ্যমে চলিছে অসমত অচিনাকি পুষ্কৰম উৎসৱ আয়োজনৰ প্ৰস্তুতি।
আজি এখন সংবাদমেল পাতি “ব্ৰহ্মপুত্ৰ পুষ্কৰম আৰু সাংস্কৃতিক মহোৎসৱ, ২০১৯” নামৰ আচহুৱা উৎসৱটোৰ কাৰ্য্যসূচী ঘোষণা কৰে আয়োজকে।
কোটি টকীয়া আধ্যাত্মিক উৎসৱটো ব্ৰহ্মপুত্ৰৰ ওপৰত ১২ দিন ধৰি অনুষ্ঠিত হ’ব আৰু দক্ষিণ ভাৰতৰ প্ৰায় ২ লাখ ভক্ত-সন্ন্যাসী আহিব, আজি প্ৰেছ ক্লাবত দিয়া সংবাদমেলত আয়োজকে জনালে।
২ লাখ ভক্ত-সন্ন্যাসীয়ে নদীখন গংগাৰ দৰেই প্ৰদূষিত কৰি তোলাৰ সংশয়ৰ মাজতে সাংবাদিকৰ প্ৰশ্নৰ উত্তৰত আয়োজকে কয় যে ভক্তসকলে গুৱাহাটীত থাকিবলৈ থ্ৰী ষ্টাৰ বা ফাইভ ষ্টাৰ হোটেল দাবী কৰিছে।
আয়োজকে কয়, “তেওঁলোকৰ বেছিভাগেই আমাক ফোন কৰি থ্ৰী ষ্টাৰ হোটেল, ফাইভ ষ্টাৰ হোটেল আছে নে সুধিছে। তেওঁলোকক কেৱল গুৱাহাটীতেই নহয় চেৰাপুঞ্জী, পৰশুৰাম কুণ্ড, কাজিৰঙা আৰু অৰুণাচলৰ জিৰ’তো ৰখাৰ ব্যৱস্থা কৰা হৈছে।”
আয়োজক সমিতিৰ সম্পাদকগৰাকীৰ দাবী যে দাক্ষিণাত্যৰ ভক্তসমূহ এইসমূহ স্থানলৈ গ’লে নিশ্চয় পৰ্য্যটন বিভাগৰ এক্টিভিটি বাঢ়িব।
“অসম আৰু পুৰ্বোত্তৰৰ পৰা কিমান মানুহ আহিব ধৰিব পৰা নাই”, আধ্যাত্মিক অনুষ্ঠানটোৰ উদ্যোক্তাৰ দায়িত্বত থকা এজন বিষয়ববীয়াই জনালে।
হাস্যকৰভাৱে পৰ্য্যটন বিভাগৰ এক্টিভিটি বঢ়াৰ কথা চিন্তা কৰা সম্পাদকগৰাকীক পৰ্য্যটন মন্ত্ৰীৰ সৈতে পুষ্কৰম কাৰ্য্যসূচী সন্দৰ্ভত আলোচনা কৰিছে নেকি বুলি সাংবাদিকে সোধাত তেওঁ কোনোধৰণৰ আলোচনা হোৱা নাই বুলি কয়। আনকি পৰ্য্যটন মন্ত্ৰী কোন বুলিহে সাংবাদিকক ওলোটাই প্ৰশ্ন কৰে শৰ্মা উপাধিৰ সম্পাদকজনে।
“পৰ্য্যটন মন্ত্ৰীৰ সৈতে আমি কথা পতা নাই। পৰ্য্যটন মন্ত্ৰী কোন? নাই আমি কোনো কথা পতা নাই। পৰ্য্যটন বিভাগৰ পৰাও আমাক কোনো আশ্বাস দিয়া নাই”, সম্পাদকজনৰ মন্তব্য।
“আমি জিলা উপায়ুক্ত তথা চৰকাৰৰ পৰা অনুমতি বিচাৰিছো। কিন্তু বৰ্তমানলৈকে চৰকাৰৰ ফালৰ পৰা কোনোধৰণৰ অনুমতি পোৱা নাই, মৌখিক আশ্বাস পাইছো। আশা কৰিছো চৰকাৰে আমাক অনুমতিটো দিব”, সম্পাদক শৰ্মাই কয়।
চৰকাৰ অথবা প্ৰশাসনৰ পৰা অনুমতি নোপোৱাকৈয়ে উদ্যোক্তাসকলে পুষ্কৰম নামৰ উৎসৱটোৰ কাৰ্য্যসূচী ঘোষণা কৰা আৰু পূৰাদমে প্ৰচাৰ চলোৱাটোৱে চকু কপালত তুলিছে বহুতৰ।
উল্লেখ কৰিব পাৰি যে, চাউথ এচিয়ান গেমছত ২০ হাজাৰ লোকৰ সমাগম হওঁতে গুৱাহাটীত থাকিবলৈ ঠাই নোহোৱা অৱস্থাৰ সৃষ্টি হৈছিল। সেই তুলনাত ব্ৰহ্মপুত্ৰ পুষ্কৰমত কেৱল দক্ষিণ ভাৰতৰ পৰাই ২ লাখ লোক আহিলে কি অৱস্থাৰ সৃষ্টি হ’ব পাৰে সেয়া চিন্তনীয়।
সংবাদমেলত এই কথাটো সাংবাদিকে সোধাত শৰ্মাই কয়, “আমাৰ ভক্তসকলে নিজৰ ঘৰত মানুহক ৰখাৰ ব্যৱস্থা কৰিব।”