শিৱসাগৰত পুনৰ ৩১ জন কোভিড পজিটিভ : এজনৰ বাহিৰে বাকীসকলৰ নাই ভ্ৰমণ বৃত্তান্ত

এক ভয়ানক পৰিস্থিতিৰ দিশে আগবাঢ়িছে শিৱসাগৰ। দৈনিক বৃদ্ধি পাই আছে কোভিড১৯ আক্ৰান্তৰ সংখ্যা।

মংগলবাৰে মাজনিশা শিৱসাগৰ জিলাৰ ৩১ জন ব্যক্তিৰ দেহত ধৰা পৰে ক’ভিড ১৯ পজিটিভ।

ইয়াৰে ৬ জন শিৱসাগৰ নগৰৰ, ১০ জন আমগুৰি, ১১ জন নাজিৰা আৰু ৪ জন ডিমৌৰ বুলি জানিব পৰা গৈছে।

শিৱসাগৰ স্বাস্থ্য বিভাগৰ পৰা লাভ কৰা অতি ভয়ানক খবৰটো হ’ল যে,  এই ৩১ জন ব্যক্তিৰ ভিতৰত মাত্ৰ এজন ব্যক্তিৰ ভ্ৰমণ বৃত্তান্ত লাভ কৰিছে।

আন এজন ব্যক্তিৰ ভ্ৰমণ বৃত্তান্ত সন্দেহজনক বুলি জানিবলৈ দিয়ে স্বাস্থ্য বিভাগে।

ইপিনে কন্টেইনমেন্ট জ’ন হিচাপে থকা অপ্সৰা নামৰ ব্যৱসায় প্ৰতিষ্ঠানখনৰ তিনিগৰাকী ব্যক্তি আৰু শিৱসাগৰ এছবিআই শিৱসাগৰ শাখাৰ এগৰাকী কৰ্মচাৰীৰ দেহত কোভিড১৯ পজিটিভ পোৱা গৈছে।

শিৱসাগৰত গণ সংক্ৰমণৰ আশংকা কৰি জিলা স্বাস্থ্য বিভাগে জনসাধাৰণক সজাগ আৰু সচেতন হৈ থাকিবলৈ আহ্বান জনাইছে।

শিৱসাগৰ জিলা স্বাস্থ্য বিভাগৰ কোভিড১৯ৰ তত্বাধায়ক ডাঃ উদয়াদিত্য ৰাজকোঁৱৰে কয়, যিহেতু ক’ৰণা এবিধ সংক্ৰমণ ৰোগ, গতিকে ৰাইজে সামাজিক দূৰত্ব মানি মাস্ক পৰিধান কৰি বাহিৰলৈ আহিবলৈ আহিব লাগে আৰু ঘনে ঘনে হাত ধুই থাকিব লাগে।

শিৱসাগৰত সংক্ৰমণ বৃদ্ধি পালে ইয়াক ৰোধ কৰাতো কঠিন হ’ব বুলি মন্তব্য কৰে ডাঃ ৰাজকোঁৱৰে।