১ কোটি টকাৰ মূল্যৰ ৪ লাখ মাস্ক জব্দ আৰক্ষীৰ; পিছে ক’ত? জানিবলৈ পঢ়ক

সমগ্ৰ দেশতে ক’ৰ’নাতংক বিয়পি পৰাৰ লগে লগে দেশত মাস্ক আৰু হেণ্ড চেনিটাইজাৰৰ তীব্ৰ নাটনিয়ে দেখা দিছে।

মাস্ক আৰু হেণ্ড চেনিটাইজাৰৰ নাটনি হোৱাৰ ফলত অসাধু চক্ৰই অধিক উচ্চ দৰত উক্ত দুয়োবিধ সামগ্ৰীৰ বিক্ৰী কৰাৰ অভিযোগ উত্থাপন হৈ আহিছে।

দেশৰ কেন্দ্ৰীয় মানৱ সম্পদ মন্ত্ৰালয়ৰ লগতে ৰাজ্যবোৰৰ স্বাস্থ্য বিভাগে এই দুইবিধ সামগ্ৰীৰ মূল্য নিৰ্ধাৰণ কৰি দিয়াৰ পিছতো বহু বিক্ৰেটাই এই নিৰ্দেশ অমান্য কৰা আহিছে।

ইফালে দেশত মাস্কৰ কৃত্ৰিম নাটনিৰো সন্দেহ কৰা হৈছিল।

এই সন্দেহ সঁচা প্ৰমাণিত কৰি পুনৰ আজি মু্ম্বাই আৰক্ষীয়ে পণ্যগাৰ আৰু গোদামত তালাচী চলাই ১ কোটি টকাৰ মূল্যৰ ৪ লাখ মাস্ক জব্দ কৰিছে।

পণ্যগাৰ আৰু পৰিৱহন গোদামত মুম্বাই আৰক্ষীয়ে বিশেষ সূত্ৰৰ পমখেদি তালাচী চলাই এই বৃহৎ পৰিমাণৰ মাস্কখিনি আজি জব্দ কৰে।

আৰক্ষীৰ সূত্ৰৰ মতে ২০০ টা কাৰ্টন থকা এই মাস্কৰখিনিৰ মূল্য ১ কোটি টকা।

আৰক্ষীয়ে নিজাববীয়াকৈ এই সংক্ৰান্তত গোদামৰ এজেন্ট আৰু চাপ্লায়াৰৰ বিৰুদ্ধে চাহাৰ আৰক্ষী থানাত গোচৰ ৰুজু কৰিছে যদিও এতিয়ালৈকে কোনো লোককে গ্ৰেপ্তাৰ কৰা নাই।

আৰক্ষীৰ উপ-আয়ুক্ত মনোজনাথ সিংঘাই কয় যে পাঁচজন লোকৰ বিৰুদ্ধে এই সংক্ৰান্তত আইনী ব্যৱস্থা গ্ৰহণ কৰা হ’ব।
উল্লেখ্য যে যোৱা সোমবাৰে মুম্বাই আৰক্ষীয়ে উচ্চ মানৰ ১৫ কোটি টকাৰ মূল্যৰ মাস্ক জব্দ কৰিছিল।