যোৱা দেওবাৰে অসমৰ মুখ্যমন্ত্ৰী সৰ্বানন্দ সোনোৱালে ছিংগাপ’ৰ আৰু অন্যান্য আছিয়ান (ASEAN) দেশসমূহক গুৱাহাটীত তেওঁলোকৰ দূতাৱাস স্থাপন কৰাৰ বাবে আহ্বান জনায়। ছিংগাপ’ৰৰ মেৰিনা বে’ ছেণ্ডত আয়োজিত আছিয়ান-ভাৰত প্ৰৱাসী ভাৰতীয় দিৱসত প্ৰদান কৰা ভাষণত তেওঁ এই আহ্বান জনায়।
সোনোৱালে কয়, ‘বাংলাদেশ আৰু ভূটানে ইতিমধ্যে গুৱাহাটীত তেওঁলোকৰ দূতাৱাস স্থাপন কৰিছে। মই আমাৰ বৈদেশিক মন্ত্ৰী সুষমা স্বৰাজক তেওঁৰ উৎকৃষ্ট কামৰ বাবে ধন্যবাদ জনাইছো আৰু আমি ছিংগাপ’ৰ আৰু অন্যান্য আছিয়ান দেশসমূহক গুৱাহাটীত তেওঁলোকৰ দূতাৱাস স্থাপন কৰাৰ বাবে আহ্বান জনাইছো।’
মুখ্য মন্ত্ৰীজনে কয়, ‘আমি আমাৰ প্ৰচেষ্টাক এক নীতিগত গতি দিবৰ বাবে সুকীয়া এটা এক্ট ইষ্ট নীতি পৰিক্ৰমা মন্ত্ৰ্যালয় স্থাপন কৰিছো। গুৱাহাটীক কেন্দ্ৰ হিচাপে লৈ গোটেই বিশ্বৰ ব্যৱসায়ৰ চাহিদা পূৰণ কৰিব পৰাকৈ অসমে বিশ্বমানৰ পৰিকাথামো নিৰ্মাণৰ পথত সুদৃঢ় খোজ আগবঢ়াইছে।’
মুখ্য মন্ত্ৰীজনে কয় যে গুৱাহাটীক আছিয়ানৰ সৈতে ভাৰতৰ সংযোগপথ কৰি দেশসমূহৰ মাজৰ বন্ধুত্বক পুনৰ নৱীকৰণ কৰাৰ বাবে দক্ষিণ-পূব এছিয়াৰ সৈতে অসমৰ ঐতিহাসিক আৰু সাংস্কৃতিক সম্পৰ্কক ব্যৱহাৰ কৰিব লাগিব।
অসমৰ সৈতে আছিয়ান আৰু দক্ষিণ-পূব এছিয়াৰ দেশসমূহৰ ঘনিষ্ঠ সম্পৰ্কৰ উল্লেখ কৰি সোনোৱালে কয় অসম আৰু আছিয়ান দেশসমূহৰ মাজত বিনিয়োগ আমদানি, পৰ্য্যটনৰ বিকাশ আৰু মানুহৰ মাজত ভাব বিনিময়ৰ ক্ষেত্ৰত ভাৰতমূলীয় লোকসকলে এক গুৰুত্বপূৰ্ণ ভুমিকা পালন কৰিব পাৰে।
আছিয়ান- ভাৰত প্ৰৱাসী ভাৰতীয় দিৱসত দেওবাৰে ভাৰতৰ বৈদেশিক মন্ত্ৰী স্বৰাজৰ সৈতে ছিংগাপ’ৰৰ বৈদেশিক মন্ত্ৰী ৱিৱিয়ান বালাক সাক্ষাৎ কৰে।
লুলু গ্ৰুপৰ সঞ্চালক য়ুছুফ আলিৰ সৈতেও সোনোৱাল এক বৈঠকত মিলিত হয় আৰু তেওঁক এদৱাণ্টেজ আচামঃ বিশ্ব বিনিয়োগ সন্মিলন ২০১৮লৈও তেওঁক আমন্ত্ৰণ কৰে। অসমত শীতল ভঁৰাল পাতি ফল-মূল ৰপ্তানিৰ বাবে খুব আগ্ৰহ প্ৰকাশ কৰা আলিক চৰকাৰ ফালৰ পৰা সহযোগিতা আগবঢ়োৱাৰ মুখ্য মন্ত্ৰী গৰাকীয়ে আশ্বাস দিয়ে।