দিল্লীৰ পৰা কোভিড নিষেধাজ্ঞা প্ৰত্যাহাৰৰ বিৰোধিতা ৬৩ শতাংশ লোকৰ
কোভিডে কালান্তক ৰূপ ধাৰণ কৰা দেশৰ ৰাজধানী চহৰ নতুন দিল্লীৰ পৰা কোভিড সম্পৰ্কীয় বহু নিষেধাজ্ঞা দিল্লীৰ চৰকাৰে প্ৰত্যাহাৰ কৰিবলৈ লোৱা সিদ্ধান্তই এতিয়া ৰাজ্য খনত প্ৰতিক্ৰিয়াৰ সৃষ্টি কৰিছে।
দিল্লীৰ বেছিভাগ বাসিন্দাই এতিয়াই কোভিড-১৯ সম্পৰ্কীয় নিষেধাজ্ঞা উঠাই লোৱাৰ পক্ষপাতী নহয় বুলি এক সমীক্ষাত প্ৰকাশ পাইছে।
উপ ৰাজ্যপাল অনিল বাইজালে শুকুৰবাৰে (২১ জানুৱাৰী) সপ্তাহান্তৰ কাৰফিউ উঠাই লোৱা আৰু বজাৰ, দোকান খোলা, অড-ইভেন নিয়ম আঁতৰ কৰিবলৈ দিল্লী চৰকাৰে যি প্ৰস্তাৱ আগবঢ়াইছে সেয়া আজি নাকচ কৰে।
বাইজালে ব্যক্তিগত কাৰ্যালয়সমূহক ৫০ শতাংশ কৰ্মচাৰীৰ উপস্থিতিৰে কাম কৰিবলৈ অনুমতি দিছে।
দিল্লী চৰকাৰে দৈনিক কোভিড-১৯ ত সংক্ৰমিত লোকৰ সংখ্যা হ্ৰাস পোৱা বুলি অনুভৱ কৰি কোভিড সম্পৰ্কীয় বহু নিয়ম প্ৰত্যাহাৰ কৰাৰ সপক্ষে মত দিছিল।
দিল্লী চৰকাৰৰ এনে প্ৰস্তাৱক চহৰ খনৰ প্ৰায় ৬৩ শতাংশ বাসিন্দাই সমৰ্থন জনোৱা নাই।
চহৰ খনৰ মাত্ৰ ৫ শতাংশ বাসিন্দাইহে কোভিড সম্পৰ্কীয় নিষেধাজ্ঞা প্ৰত্যাহাৰৰ সপক্ষে মত দিছে।
দিল্লীত বৃহস্পতিবাৰে ১২,৩০৬ গৰাকী লোক কোভিডত নতুন কৈ আক্ৰান্ত হৈছে। এদিনতে চহৰ খনত কোভিডত মৃত্যু ঘটিছে ৪৩ জনকৈ লোকৰ।
এতিয়াও দিল্লীত ২,৫৩৯ জন কোভিড ৰোগী চিকিৎসালয়ত আছে আৰু তেওঁলোকৰ ১৫২ জন ভেণ্টিলেটৰত আছে।