দীৰ্ঘদিন বিৰতিৰ মূৰত বিজেপিৰ বিৰুদ্ধে সোচ্চাৰ ৭০ জাতীয় সংগঠন : গুৱাহাটীত মানৱ শৃংখল

পুনৰ বিজেপিৰ বিৰুদ্ধে সৰৱ হৈ উঠিছে ৭০ টাকৈ জাতীয় সংগঠন।

দীৰ্ঘদিন বিৰতিৰ মূৰত আজি পুনৰ CAA ৰ বিৰুদ্ধে একেলগে সক্ৰিয় হৈ উঠিছে KMSS কে ধৰি ৭০ টাকৈ জাতীয় সংগঠনৰ প্ৰতিনিধি।

সোমবাৰে সংগঠনকেইটাৰ প্ৰতিনিধিয়ে বিজেপি চৰকাৰৰ বিৰুদ্ধে মানৱ শৃংখল কাৰ্যসূচী ৰূপায়ণ কৰি উত্তাল কৰি তোলে মহানগৰীৰ চচলৰ ৰাজপথ।

কাৰাৰুদ্ধ অখিল গগৈক মুক্তি দিয়াৰ দাবী জনোৱাৰ লগতে জাতিধ্বংসী নাগৰিকত্ব সংশোধনী আইন বাতিলৰ দাবীৰে উত্তাল কৰি তোলে মহানগৰীৰ ৰাজপথ।

প্ৰতিবাদত অংশগ্ৰহণ কৰি ৭০ সংগঠনৰ অন্যতম নেতা তথা অনুসূচিত জাতি যুৱ ছাত্ৰ পৰিষদৰ সভাপতি ৰুবুল দাসে কয় “যিকোনো মূল্যৰ বিনিময়ত জাতিধ্বংসী “কা” আইন বাতিল কৰিব লাগিব। অখিল গগৈকে ধৰি কা বিৰোধী আন্দোলনৰ নেতাসকলক শীঘ্ৰে বিনা চৰ্তে মুকলি কৰি দিব লাগিব।”

“এইখন স্বেচ্ছাচাৰী আৰু ভ্ৰষ্টাচাৰী চৰকাৰ। হিটলাৰ জীয়াই থকাহেঁতেন চৰকাৰৰ এই নীতিসমূহ দেখি তেওঁ নিজে কঁপি উঠিলহেঁতেন। বিজেপি চৰকাৰ ইমান ভয় খাইছে কিয়? তেওঁলোকে কা বিৰোধী নেতালৈ ভয় খাই বাৰেপতি গ্ৰেপ্তাৰ কৰি কা পুৰুষালিৰ পৰিচয় কিয় দিছে?” বিজেপি চৰকাৰক কটাক্ষ কৰি দাসে কয়।

আজি এয়া আৰম্ভণি বুলি দাবী কৰি ভৱিষ্যতে কোভিড প্ৰট’কল মানি চলি “কা” ৰ বিৰুদ্ধে ৭০ টা সংগঠনে উত্তাল প্ৰতিবাদ কৰাৰ হুংকাৰ দিয়ে ৰুবুল দাসে।

কাইলৈৰ পৰা ৰাজ্যৰ গাঁৱে ভুয়ে কা বাতিলৰ দাবীৰে আৰু অখিল গগৈক মুক্তিৰ দাবীৰে আন্দোলন আৰম্ভ কৰিব বুলি দাসে জানিবলৈ দিয়ে।

কৃষক মুক্তি সংগ্ৰাম সমিতি, অনুসূচিত জাতি যুৱ ছাত্ৰ পৰিষদ, টাই আহোম যুৱ পৰিষদ, অসমীয়া যুৱ মঞ্চ, সদৌ কলিতা ছাত্ৰ সন্থা, সদৌ গৰীয়া যুৱ পৰিষদ, স্বৰাজ অসম, আদিবাসী ছাত্ৰ সন্থা, মদ মুক্তি সংগ্ৰাম সমিতি, আহোম সেনাকে ধৰি মুঠ ৭০ টাকৈ সংগঠনে আজি প্ৰতিবাদ সাব্যস্ত কৰে।