বোকাখাতত মহকুমা প্ৰশাসনৰ উদ্যোগত ৭৩ সংখ্যক স্বাধীনতা দিৱস উদযাপন

দেশৰ লগতে বোকাখাততো মহকুমা প্ৰশাসনৰ উদ্যোগত আজি ৭৩ সংখ্যক স্বাধীনতা দিৱস উদযাপন কৰা হয় ৷

বোকাখাত ৰাজহুৱা খেলপথাৰত আয়োজিত এই বিশেষ অনুষ্ঠানত ৰাষ্ট্ৰীয় পতাকা উত্তোলন কৰে বোকাখাতৰ মহকুমাধিপতি বিবেক শ্যামে ৷

মহকুমাটোৰ বিভিন্ন বিভাগৰ বিষয়া কৰ্মচাৰীৰ উপৰি স্থানীয় জ্যেষ্ঠ নাগৰিক, বিদ্যালয়ৰ শিক্ষক-শিক্ষয়ত্ৰী আৰু ছাত্ৰ-ছাত্ৰী তথা স্থানীয় লোকে অংশ গ্ৰহন কৰা এই দিৱসত মহকুমাধিপতিয়ে ছাত্ৰ ছাত্ৰী, আৰক্ষী আৰু কাজিৰঙাৰ বিশেষ গঁড় সুৰক্ষা দলৰ অভিবাদন গ্ৰহন কৰে।

স্থানীয় শিক্ষানুষ্ঠানৰ ছাত্ৰ-ছাত্ৰী আৰু আৰক্ষীৰ লগতে প্ৰথম বাৰৰ বাবে কাজিৰঙাৰ নৱ নিযুক্ত বিশেষ গঁড় সুৰক্ষা বাহিনীয়ে আজিৰ স্বাধীনতা দিৱসৰ পেৰেডত অংশ গ্ৰহন কৰে ৷

অনুষ্ঠানত বিভিন্ন ক্ষেত্ৰত সেৱা আগবঢ়োৱা বোকাখাত মহকুমাৰ অৰ্ধ শতাধিক ব্যক্তি আৰু অনুষ্ঠান প্ৰতিষ্ঠানক মহকুমা প্ৰশাসনৰ তৰফৰ পৰা সম্বৰ্ধনা জনোৱা হয় ৷

স্বাধীনতা দিৱসৰ প্ৰাক ক্ষণত বিগত দুটা দিনত ছাত্ৰ-ছাত্ৰীৰ মাজত আয়োজিত বিভিন্ন প্ৰতিযোগিতাত স্থান লাভ কৰা প্ৰতিযোগীসকলক বঁটা প্ৰদান কৰা হয় ৷

আজিৰ পতাকা উত্তোলনৰ সময়ত আয়োজিত ছাত্ৰ-ছাত্ৰীৰ কুচকাৱাজত স্থান লাভ কৰা বিদ্যালয় সমূহকো বঁটা প্ৰদান কৰা হয়।

পৰৱৰ্তী সময়ত বোকাখাত অসামৰিক চিকিৎসালয়ৰ ৰোগী আৰু অনাথ আশ্ৰমৰ শিশুৰ মাজত ফল-মূল বিতৰণ, দেশপ্ৰম মূলক বোলছবি প্ৰদৰ্শন আৰু বিয়লিলৈ বোকাখাতৰ ৰাজহুৱা খেলপথাৰত প্ৰীতি ফুটবলৰো আয়োজন কৰা হৈছ।