বৃহস্পতিবাৰৰ পৰা পৰা মাজুলীত সপ্তম মিচিং যুৱ মহোৎসৱ
গুমৰাগ নৃত্য, ঐনিতম, ঢোলৰ শব্দৰে উখল-মাখল পৰিৱেশৰ সৃষ্টি হৈছে মাজুলীৰ জেংৰাইমূখৰ খেৰকটীয়া নদীৰ পাৰ। বৃহস্পতিবাৰৰ পৰা আৰম্ভ হ’ব সপ্তম সংখ্যক মিচিং যুৱ মহোৎসৱ।
চাৰিদিনীয়া বৰ্ণাঢ্য কাৰ্যসূচীৰে মাজুলী জেংৰাইমুখৰ খেৰকটীয়া নৈৰ পাৰত অনুষ্ঠিত হ’ব লগা সপ্তম সংখ্যক মিচিং যুৱ মহোৎসৱৰ বাবে আটক ধুনীয়াকৈ সাজি উলিওৱা হৈছে বৃহৎ চাংঘৰৰ লগতে মণ্ডপ।
আজি প্ৰস্তুতিমূলকভাৱে মাজুলীৰ কাৰ্কিচুক কৃষ্টি দল, বালি জকাইবোৱা কৃষ্টি দল, অবিভক্ত জেংৰাইমুখ কৃষ্টি দল, সপ্তম সংখ্যক মিচিং যুৱ মহোৎসৱৰ কোৰাচ দল আদিৰ লগতে মাজুলীৰ বিশখন গাঁৱৰ মহিলা কৃষ্টি দলৰ সদস্যাৰ সৈতে প্ৰায় দুই শতাধিক নাচনী, ঢুলীয়া, তালিয়াকে ধৰি বিভিন্ন শিল্পীয়ে মিচিং জাতীয় সাজপাৰ পৰিধান কৰি ঐনিতম তথা গোমৰাগ নৃত্যৰে মুখৰিত কৰি তোলে সমগ্র মহোৎসৱৰ বাকৰি।
পুৰুষ-মহিলা, আবাল-বৃদ্ধ, বনিতা, যুৱক-যুৱতী আদি সকলো একাকাৰ হৈ এক অন্যন্য সাংস্কৃতিক পৰিৱেশ সৃষ্টিৰ মাজেৰে মিচিং জনগোষ্ঠীৰ লোকসকলে ঐক্য তথা সম্প্ৰীতিৰ পৰিচয় ফুটাই তোলে।
ইফালে এই মহোৎসৱৰ কাৰ্যসূচী সফল কৰি তোলাৰ বাবে এক সজাগতা সভাও অনুষ্ঠিত হয়।
উদযাপন সমিতিৰ সাধাৰণ সম্পাদক ৰাজীৱ পেগুৱে আঁত ধৰা অনুষ্ঠানত মিচিং বানে কেবাঙৰ সাধাৰণ সম্পাদক ৰাজু মেদকে আগন্তুক মিচিং যুৱ মহোৎসৱৰ কাৰ্যসূচী সফল কৰি তুলিবলৈ সকলো মিচিং ৰাইজৰ সক্ৰিয় অংশগ্ৰহণ কামনা কৰে।