চীনত ক’ৰ’না ভাইৰাছৰ আতংক; ভাৰতত সতৰ্কতা জাৰি স্বাস্থ্য বিভাগৰ

ভাৰতৰ চুবুৰীয়া দেশ চীনত বৰ্তমান সময়ত আতংকৰ সৃষ্টি কৰিছে ক’ৰ’না ভাইৰাছে।

চীনৰ চৈধ্যখন প্ৰদেশত ভাইৰাছবিধৰ সংক্ৰমণ হৈছে আৰু ইয়াৰ ফলত মুঠ ৪৪০ গৰাকী লোক আক্ৰান্ত হোৱাৰ লগতে ন গৰাকী লোকৰ মৃত্যু হৈছে।

চীনৰ বিভিন্ন প্ৰদেশলৈ দ্ৰুতগতিত ক’ৰ’না ভাইৰাছ সংক্ৰমিত হৈছে বুলি চীনৰ সংবাদ মাধ্যমৰ পৰা জানিব পৰা গৈছে।

আনহাতে, বৰ্তমানলৈ ভাৰতত ক’ৰ’না ভাইৰাছৰ সংক্ৰমণৰ কোনোধৰণৰ ঘটনা পোহৰলৈ অহা নাই বুলি বুধবাৰে কেন্দ্ৰীয় স্বাস্থ্য মন্ত্ৰ্যালয়ৰ তৰফৰ পৰা সদৰী কৰা হৈছে।

চীনৰ পৰা কলকাতা, দিল্লী, মুম্বাই আদি বিভিন্ন বিমান বন্দৰলৈ অহা বিমান যাত্ৰী সকলৰ বিমান বন্দৰতে স্বাস্থ্য পৰীক্ষা কৰা হৈছে আৰু তেওঁলোকৰ শৰীৰত ক’ৰ’না ভাইৰাছৰ কোনোধৰণৰ উপস্থিতি পোৱা নাই বুলি স্বাস্থ্য বিভাগে নিশ্চিতি প্ৰকাশ কৰিছে।

উল্লেখযোগ্য যে, চুবুৰীয়া চীনৰ পৰা ভাৰতলৈও ক’ৰ’না ভাইৰাছৰ সংক্ৰমণ ঘটিব পাৰে বুলি ইতিমধ্যেই ভাৰত চৰকাৰৰ স্বাস্থ্য বিভাগে সতৰ্কতা অৱলম্বন কৰিছে।

আনহাতে, বিশ্ব স্বাস্থ্য সংস্থাই চীনৰ বৰ্তমানৰ পৰিস্থিতি পৰ্যবেক্ষণ কৰি আছে বুলি জানিব পৰা গৈছে। বিশ্ব স্বাস্থ্য সংস্থাই পৰিস্থিতিৰ অধিক অৱনতি ঘটিলে বিশ্ব স্বাস্থ্য সতৰ্কতা জাৰি কৰিব পাৰে।