গোলাঘাট পৌৰসভাৰ ডাম্পিং গ্ৰাউণ্ডৰ জুই-ধোঁৱাই সৃষ্টি কৰিছে ব্যাপক বায়ু প্ৰদূষণ

প্ৰধান মন্ত্ৰী নৰেন্দ্ৰ মোদীয়ে দেশজুৰি স্বচ্ছতাৰ বাবে ব্যাপক প্ৰচাৰ আৰু বিভিন্ন আঁচনি হাতত লোৱাৰ  সময়তে গোলাঘাট নগৰত এক বিপৰীত ছবি প্ৰতিফলিত হৈছে।

গোলাঘাট পৌৰসভাৰ ডাম্পিং গ্ৰাউণ্ডৰ জুই আৰু প্ৰদূষিত ধোঁৱাই বৰ্তমান ইয়াৰ পাৰ্শ্বৱৰ্তী এলেকাৰ জনসাধাৰণৰ জীৱনলৈ সংশয় কঢ়িয়াই আনিছে।

বিশেষকৈ বুধাবাৰে নিশা এৰেংগাপাৰাৰ ডাম্পিং গ্ৰাউণ্ডত  জুইৰ প্ৰকোপ বৃদ্ধি পোৱাত সমগ্ৰ গোলাঘাট চহৰ আৰু পাৰ্শ্ব্ৱ্তী এলেকাত সৃষ্টি হোৱা বায়ু প্ৰদূষণ আজিও অব্যাহত আছে।

স্থানীয় ৰাইজে জনোৱা মতে ধনশিৰি নদীৰ পাৰত বছৰ বছৰ ধৰি পলিথিনকে ধৰি চহৰৰ পেলনীয়া আৱৰ্জনাসমূহ জ্বলাই আহিছে। প্ৰতিদিনে জ্বলোৱা জাৱৰৰ বিষাক্ত ধোঁৱাই সমগ্ৰ এলেকাটোৰ বায়ুমণ্ডল আৱৰি ধৰে। ফলত কেঞ্চাৰ, টিবি, চৰ্মৰোগ আদিত আক্ৰান্ত হ’বলৈ ধৰিছে অঞ্চলবাসী।

আনহাতে চহৰত থকা চিকিৎসালয়, নাৰ্চিংহোম, লেৱৰেটৰী আদিৰ পেলনীয়া দ্ৰব্যসমূহ মেচিনৰ সহায়ত নিস্কাষন কৰিব লাগে যদিও পৌৰসভাৰ গাড়ীৰে সেইবোৰ নি জ্বলাই দিয়ে বুলিহে প্ৰত্যক্ষদৰ্শী ৰাইজে অভিযোগ কৰিছে।

তেনেদৰে জ্বলাই দিয়া জাবৰৰ ধোঁৱাৰ প্ৰকোপ বুধবাৰে নিশা বিপদজনকভাৱে বৃদ্ধি পোৱাত অগ্নিনিৰ্বাপক বাহিনীয়ে গৈ জুই নুমুৱালে যদিও বিষাক্ত ধোৱাৰ প্ৰকোপ আঁতৰাব নোৱাৰিলে।

ইয়াৰ পৰিপ্ৰেক্ষিতত আজি পুৱা জিলা প্ৰশাসনৰ লোক আৰু প্ৰদূষণ নিয়ন্ত্ৰণ ব’ৰ্ডৰ লোক গৈ উক্ত স্থান পৰিদৰ্শন কৰে।

আন এক লক্ষণীয় কথা হ’ল যে উক্ত জাৱৰ নিস্কাষন স্থলীৰ কাষেৰেই ধনশিৰি নৈ বৈ গৈছে আৰু উক্ত নদীৰ পানীকে গোলাঘাট পৌৰসভাই উত্তোলন কৰি চহৰৰ হোটেল আৰু প্ৰতিটো ৱাৰ্ডতে যোগান ধৰি আহিছে।

এনেবোৰ কাৰণতে ২০১৭ চনৰ পৰা স্থানীয় ৰাইজে প্ৰশাসনৰ ওচৰত দাবী জনাই আহিছে যদিও আজি পৰ্যন্ত কোনো পদক্ষেপ নোলোৱাত ব্যাপক সমস্যাই ৰূপ ল’বলৈ ধৰিছে।