কৰোনাৰ বিৰুদ্ধে যুঁজাত চাহিদা বৃদ্ধি পোৱা হাইড্ৰ’চাইক্লৰোকুইনৰ ৰপ্তানি বন্ধ কৰিলে ভাৰতে

কৰোনাৰ সংহাৰী আতংকৰ মাজতে চৰকাৰে বুধবাৰে মেলেৰীয়া প্ৰতিৰোধী দৰৱ হাইড্ৰ’চাইক্লৰোকুইনৰ ৰপ্তানি শীঘ্ৰে বলবৎ হোৱাকৈ বন্ধ কৰিছে।

চৰকাৰে উক্ত দৰৱ বিধ ঘৰুৱা বজাৰত পৰ্যাপ্তভাৱে সুলভ হোৱাটো নিশ্চিত কৰিব বিচাৰিছে।

ইণ্ডিয়ান কাউন্সিল অফ মেডিকেল ৰিচাৰ্ছ (আই চি এম আৰ)ৰ সঞ্চালক প্ৰধান বলৰাম ভাৰ্গৱে সোমবাৰে সন্দেহজনক বা নিশ্চিত কৰোনা ভাইৰাছ আক্ৰান্ত ৰোগীক চিকিৎসাৰ বাবে স্বাস্থ্যকৰ্মীসকলক হাইড্ৰ’চাইক্লৰোকুইন ব্যৱহাৰ কৰিবলৈ পৰামৰ্শ দিছিল।

COVID-19 ৰ বাবে আই চি এম আৰে গঠন কৰি দিয়া নেশ্যনেল টাস্ক ফোৰ্চৰ চিকিৎসা পদ্ধতিৰ পৰামৰ্শ ড্ৰাগ কন্ট্ৰ’লাৰ জেনেৰেল অফ ইণ্ডিয়া (ডি জি চি আই)য়ে জৰুৰীকালীন পৰিস্থিতিত নিয়ন্ত্ৰিত ব্যৱহাৰৰ বাবে অনুমোদন জনাইছিল।

বুধবাৰে ৰপ্তানি-আমদানিৰ বিষয় চোৱাচিতা কৰা বাণিজ্য মন্ত্ৰ্যালয়ৰ এক শাখা ডিৰেক্টৰেট জেনেৰেল অফ ফৰেইন ট্ৰেডৰ পৰা জাৰি কৰা এক জাননীত কোৱা হৈছে,’’ হাইড্ৰ’চাইক্লৰোকুইন আৰু হাইড্ৰ’চাইক্লৰোকুইনৰ পৰা তৈয়াৰ কৰা দৰৱৰ ৰপ্তানি শীঘ্ৰে প্ৰযোজ্য হোৱাকৈ নিষিদ্ধ কৰা হৈছে।‘’

জাননীত লগতে কোৱা হৈছে যে চৰকাৰে বৈদেশিক মন্ত্ৰ্যালয়ৰ পৰামৰ্শৰ ভিত্তিত পৰিস্থিতি সাপেক্ষে মানৱীয়তাৰ খাতিৰত ঔষধৰ ৰপ্তানি কৰিবলৈ অনুমতি দিব।

অৱশ্যে ২৫ মাৰ্চ ২০২০ৰ পূৰ্বে আগতীয়া অনুজ্ঞাপত্ৰ প্ৰদান কৰা আৰু তথ্য প্ৰমান সাপেক্ষে ইতিমধ্যে ৰপ্তানিৰ বাবে চুক্তিবদ্ধ হোৱা ক্ষেত্ৰত ৰপ্তানিৰ অনুমতি দিয়া হ’ব।

বাতৰি অনুসৰি, আমেৰিকা যুক্তৰাষ্ট্ৰৰ ৰাষ্ট্ৰপতি ডোনাল্ড ট্ৰাম্পে COVID-19 ৰ চিকিৎসাৰ ক্ষেত্ৰত এই দৰৱ বিধ কাৰ্যকৰী বুলি কোৱাৰ পাছত হাইড্ৰ’চাইক্লৰোকুইন আৰু ক্লৰ’কুইনৰ চাহিদা সাংঘাতিকভাৱে বৃদ্ধি পাইছে আৰু লোকসকলে ইয়াক ক্ৰয় কৰাৰ বাবে ভিৰ কৰিছে।

যোৱা কেই সপ্তাহত ভাৰতে ছেনিটেইজাৰ, সকলো ধৰণৰ ভেন্টিলেটৰ আৰু ছাৰ্জিকেল মাস্ককে ধৰি বহু মেডিকেল সামগ্ৰীৰ ৰপ্তানি নিষিদ্ধ কৰিছে।