গাওঁখনৰ নাম কৰ’না; দেশত কৰ’না ভাইৰাছৰ প্ৰকোপ বৃদ্ধিৰ লগে লগে বিদ্বেষৰ সন্মুখীন গাঁওবাসী

কৰ’নাৰ আতংকত সমগ্ৰ বিশ্বই এতিয়া কম্পমান। কৰ’নাৰ সংক্ৰমণৰ শংকাত সকলোৱে বঢ়াই তুলিছে সামাজিক দূৰত্ব। এজনে আনজনৰ কাষ চাপিবলৈয়ো শংকিত হৈ পৰিছে।

কৰ’না মহামাৰীৰ নামটোৱে এতিয়া এক আতংক হৈ পৰিছে। এই নামটোৰ ফলতেই বিপদত পৰিছে উত্তৰ প্ৰদেশৰ এখন গাঁৱৰ লোকসকল।

এই গাঁৱখনৰ কাষেৰেও পাৰ হৈ যাব নিবিচৰা হৈছে কোনো লোক। দৰাচলতে, উত্তৰ প্ৰদেশৰ সীতাপুৰৰ ওচৰৰ এই গাঁৱখনৰ নাম হৈছে কৰ’না।

সম্প্ৰতি কৰ’নাৰ ফলত গোটেই বিশ্বই আতংকিত। চিকিৎসক তথা বিশেষজ্ঞসকলে পৰিস্থিতিটো কঠিন বুলি অভিহিত কৰিছে।

দেশত আক্ৰান্তৰ সংখ্যা ইতিমধ্যে হাজাৰ অতিক্ৰম কৰিছে আৰু মুঠতে ৩০ জন লোক মৃত্যুমুখত পৰিছে।

দেশৰ ভিতৰত সৰ্বাধিক আক্ৰান্তৰ সংখ্যা হৈছে মহাৰাষ্ট্ৰত। বিশ্বত ইতিমধ্যে ৬লাখৰো অধিক লোক কৰ’নাত আক্ৰান্ত হৈছে।

লকডাউনৰ মাজতে দেশত সাধাৰণ জনতাই বিভিন্ন স্থানত ভিৰ কৰা দেখা গৈছে। ফলত সংক্ৰমণৰ সংখ্যা বৃদ্ধি পাইছে।

ইয়াৰ মাজতে উত্তৰ প্ৰদেশৰ সীতাপুৰৰ কৰ’না গাঁৱৰ বাসিন্দাসকল সমস্যাত পৰিছে। সেই গাঁৱৰ এজন বাসিন্দাই কৈছে,’’আমাক কোনেও কামত নোলোৱা হৈছে। চৰকাৰী অনুদান ল’বলৈ গ’লেও একাষৰীয়া কৰিছে। আমি কৰ’নাৰ পৰা অহা বুলিয়েই সকলোৱে পলাইছে। ভাবিছে আমি মহামাৰী বিয়পাইছো। কোনেও বুজিব খোজা নাই, আমি ভাইৰাছ নহয়, আমাৰ গাঁওখনৰ নাম কৰ’না।‘’

এনেদৰেই এতিয়া কৰ’না গাঁৱবাসীয়ে কৰ’নাৰ বাবে এক বুজিব নোৱাৰা সামাজিক দূৰত্বত অৱস্থান কৰিবলগীয়া হৈছে।