প্ৰধানমন্ত্ৰী নৰেন্দ্ৰ মোদীলৈ ৰাহুল গান্ধীৰ পত্ৰ; গৃহাভিমুখী শ্ৰমিকসকলক সহায় কৰক

কংগ্ৰেছ নেতা ৰাহুল গান্ধীয়ে প্ৰধানমন্ত্ৰী নৰেন্দ্ৰ মোদীলৈ এক পত্ৰ প্ৰেৰণ কৰিছে।

মাৰাত্মক ক’ৰ’না ভাইৰাছৰ সংক্ৰমণ ৰোধ কৰিবলৈ দেশত ২১ দিনীয়া ল’কডাউন অব্যাহত থকাৰ সময়তে দিল্লীৰ লগতে দেশৰ বিভিন্ন মহানগৰীৰ নিৰ্মাণ খণ্ডত কৰ্মৰত অসংগঠিত হাজাৰ হাজাৰ শ্ৰমিকৰ জীৱনলৈ নামি আহিছে চৰম বিপৰ্যয় আৰু দুৰ্দশা।

খাদ্য আৰু আশ্ৰয়ৰ সংকটত পৰা এই অসংগঠিত শ্ৰমিকসকলে সংশ্লিষ্ট মহানগৰীৰ কৰ্মস্থলীৰ পৰা পদব্ৰজে শ শ কিলোমিটাৰ দূৰত্ব অতিক্ৰম কৰি নিজ গৃহাভিমুখে যাত্ৰা কৰিছে।

এই ধাৰা আজি তৃতীয় দিনাও অব্যাহত আছে।

শ্ৰমিকসকলৰ এনে দুৰ্দশাৰ সময়তে কংগ্ৰেছ নেতা ৰাহুল গান্ধীয়ে প্ৰধানমন্ত্ৰী নৰেন্দ্ৰ মোদীলৈ পত্ৰ লিখি এই দুৰ্দশাগ্ৰস্ত শ্ৰমিকসকলক সহায় কৰিবলৈ আহ্বান জনাইছে।

ৰাহুল গান্ধীয়ে পত্ৰখনৰ জৰিয়তে প্ৰধানমন্ত্ৰীক আহ্বান জনাইছে যে, চৰকাৰে এই শ্ৰমিকসকলৰ বাবে ব্যৱস্থা  গ্ৰহণ কৰা উচিত।

তেওঁ পত্ৰখনত কয় যে ‘হাজাৰ হাজাৰ শ্ৰমিকে তেওঁলোকৰ দৈনিক মজুৰি অবিহনে অসুৰক্ষিতভাৱে বিভিন্ন ৰাজ্যৰ সীমান্ত পাৰ হৈ নিজ গৃহাভিমুখে পদযাত্ৰা কৰিছে। এই সংগ্ৰামী আশ্ৰয়হীন শ্ৰমিকসকলক আমি নগদ ধন আৰু একাউন্টৰ জৰিয়তে ধন দি সহায় কৰাৰ লগতে আশ্ৰয়স্থলো প্ৰদান কৰিব লাগে।’

‘এই দৰিদ্ৰ শ্ৰমিকসকলক আমি অতি শীঘ্ৰেই সামাজিক সুৰক্ষাও প্ৰদান কৰিব লাগে।’ তেওঁ কয়।

উল্লেখ্য যে, ২০০ কিলোমিটাৰ এনে গৃহাভিমুখী পদযাত্ৰা কৰি নিজ গৃহত উপস্থিত হোৱাৰ পিছত এজন শ্ৰমিকৰ ইতিমধ্যে মৃত্যুও ঘটিছে।