NRCৰ বাবে পৰিচিত প্ৰতীক হাজেলাক স্বাস্থ্য বিভাগৰ আয়ুক্ত পদৰ পৰা অপসাৰণ

বুধবাৰে মধ্য প্ৰদেশৰ মুখ্য মন্ত্ৰী শিৱৰাজ সিং চৌহানে ৰাজ্যখনৰ স্বাস্থ্য বিভাগৰ আয়ুক্ত পদৰ পৰা পৰা প্ৰতীক হাজেলাক অপসাৰিত কৰে।

উল্লেখ্য যে প্ৰতীক হাজেলা যোৱা বছৰৰ নৱেম্বৰলৈকে অসমৰ ৰাষ্ট্ৰীয় নাগৰিক পঞ্জী (এন আৰ চি)ৰ ৰাজ্যিক সমন্বয়কৰ দায়িত্বত আছিল।

মধ্য প্ৰদেশ চৰকাৰৰ এটা ভিতৰুৱা সূত্ৰৰ পৰা জানিব পৰা মতে, ক’ৰ’না ভাইৰাছৰ প্ৰতিৰোধৰ ক্ষেত্ৰত হাজেলাৰ কাম-কাজত সন্তুষ্ট নহয় মুখ্য মন্ত্ৰী চৌহান। সেয়ে তেওঁক এই পদৰ পৰা অপসাৰিত কৰা বুলি জানিব পৰা গৈছে।

এতিয়া এই পদত মধ্য প্ৰদেশ চৰকাৰে ১৯৯৬ বৰ্ষৰ IAS বিষয়া ফৈজ আহমদ কিদৱাইক দায়িত্ব প্ৰদান কৰিছে।

‘মুখ্য মন্ত্ৰী শিৱৰাজ সিং চৌহানে ক’ৰ’না ভাইৰাছ সন্দৰ্ভত ৰাজ্যখনৰ শেহতীয়া পৰিস্থিতিৰ বিষয়ে পৰ্যালোচনা কৰাত হাজেলাৰ কাম-কাজত অসন্তুষ্ট হয় আৰু তেওঁক সেই পদৰ পৰা অপসাৰিত কৰাৰ নিৰ্দেশ দিয়ে’, নাম প্ৰকাশত অনিচ্চুক মধ্য প্ৰদেশৰ এগৰাকী জ্যেষ্ঠ বিষয়াই জানিব দিয়ে।

ইফালে সাংবাদিকে হাজেলাৰ অপসাৰণৰ কাৰণ জানিব বিচৰাত মুখ্য মন্ত্ৰী চৌহানে কয়, ‘ৰাজ্যৰ সকলো কৰ্মচাৰীয়ে ভাল কাম কৰি আছে। মেডিকেল ষ্টাফ, নাৰ্চ, আৰক্ষী, বিভিন্ন জৰুৰী বিভাগ, পৌৰ নিগমৰ কৰ্মচাৰী সকলে ভাল কাম কৰি আছে, কিন্তু অবহেলা সহ্য কৰা নহ’ব’।

উল্লেখ্য যে হাজেলাই ২০১৩চনৰ পৰাই অসমত এন আৰ চি প্ৰস্তুতিৰ কামৰ অনুশীলনৰ নেতৃত্ব দি আহিছিল। ৰাজ্য চৰকাৰ তথা বিজেপিৰ সমালোচনাৰ মাজতে ২০১৯ বৰ্ষৰ ১৮ অক্টোবৰত হাজেলাক উচ্চতম ন্যায়ালয়ে মধ্য প্ৰদেশলৈ বদলিৰ নিৰ্দেশ দিছিল।