লকডাউনৰ সময়ত দৰিদ্ৰ লোকলৈ ৰাজ্য চৰকাৰে প্ৰদান কৰা নাই সাহায্য : দেবব্ৰত শইকীয়া

অন্য ৰাজ্যৰ তুলনাত অসম চৰকাৰে দৰিদ্ৰ লোকৰ বাবে নিজাববীয়াকৈ পেকেজ ঘোষণা কৰা নাই। কেন্দ্ৰীয় চৰকাৰৰ ফালৰ পৰা অহা সাহায্য অসমৰ বহু দুখীয়া ৰাইজ বা শ্ৰমিকে লাভ কৰা নাই। লকডাউনৰ ১২ দিনৰ পাছত এই গুৰুতৰ অভিযোগ তুলিছে বিৰোধী দলপতি দেৱব্ৰত শইকীয়াই।

ইয়াৰোপৰি,ৰেচন কাৰ্ড নথকা সকলক ১০০০ টকাকৈ দিয়াৰ কথা চৰকাৰে ঘোষণা কৰাৰ পাছতো গাঁও অঞ্চলৰ বহু ৰাইজে লাভ কৰিবলৈ সক্ষম হোৱা নাই বুলি শইকীয়াই অভিযোগ তোলে।

লকডাউনৰ ফলত উপাৰ্জনৰ পথ নোহোৱা হৈ যোৱা সকলৰ বাবে চিন্তা চৰ্চা কৰিবলৈ চৰকাৰক তেওঁ আহ্বান জনায়।

আনহাতে, ৰাজ্যৰ বিভিন্ন প্ৰান্তত লোকডাউনৰ ফলত এৰী পলু খেতিত জলসিঞ্চন আৰু সাৰ প্ৰয়োগ কৰাৰ ক্ষেত্ৰত কৃষকসকল অসুবিধাৰ সন্মুখীন হোৱা বুলি অভিযোগ তুলি শইকীয়াই লগতে কয়, “কৃষি বিভাগে এই এৰী খেতিসমূহ নষ্ট নহ’বলৈ সেই অঞ্চলসমূহত জলসিঞ্চন আৰু সাৰৰ যোগান ধৰিব লাগে।”

তদুপৰি, গাওঁৰ কৃষক ৰাইজৰ পৰা শাকপাচলি ক্ৰয় কৰি চৰকাৰে বিক্ৰী কৰাৰ ব্যৱস্থা কৰিবলৈও শইকীয়াই আহ্বান জনায়।