ডিটেনশ্যন কেম্পৰ পৰা বন্দীক মুকলিৰ প্ৰসংগত দাখিল কৰা আবেদন সন্দৰ্ভত উচ্চতম ন্যায়ালয়ৰ ৰাজ্য চৰকাৰলৈ জাননী

ক’ৰ’না ভাইৰাছৰ সংক্ৰমণ ৰোধৰ বাবে ডিটেনশ্যন কেম্পৰ বন্দী সকলক মুকলি কৰি দিয়াৰ প্ৰসংগত কৰা এক আবেদন সন্দৰ্ভত উচ্চতম ন্যায়ালয়ে মঙলবাৰে অসম চৰকাৰলৈ জাননী জাৰি কৰিছে।

‘জাষ্টিচ এণ্ড লিবাৰ্টি ইনিচিয়েটিভ’ নামৰ এটা স্বেচ্ছাসেৱী সংস্থাই বিগত ২৫ মাৰ্চত উচ্চতম ন্যায়ালয়ৰ সন্মুখত আবেদন দাখিল কৰিছিল।

জানিব পৰা মতে, আবেদনখনত ডিটেনশ্যন কেম্পত দুবছৰতকৈ অধিক সময় অতিবাহিত কৰা লোক সকলক মুকলি কৰি দিয়াৰ বাবে দাবী উত্থাপন কৰা হৈছিল।

ৰাজ্যসভাত গৃহ মন্ত্ৰ্যালয়ে ১১ মাৰ্চত ছয়টা ডিটেনশ্যন কেম্পত মুঠ ৮০২ গৰাকী বন্দী আছে বুলি দাঙি ধৰা তথ্যৰ বিষয়েও আবেদনখনত উল্লেখ কৰা হৈছে।

২০১৯ বৰ্ষত ডিটেনশ্যন কেম্পত ১০ গৰাকী লোকৰ মৃত্যু হৈছে।

উচ্চতম ন্যায়ালয়ত দাখিল কৰা আবেদনখনত অধিক সংখ্যক লোক থকা বাবে ডিটেনশ্যন কেম্পসমূহত ক’ৰ’না ভাইৰাছৰ সংক্ৰমণৰ সম্ভাৱনা অধিক বুলি উল্লেখ কৰা হৈছে।

অসমত মঙলবাৰে ক’ৰ’না ভাইৰাছত আক্ৰান্ত হোৱা লোকৰ সংখ্যা ২৮ গৰাকীলৈ বৃদ্ধি পায়।

আনহাতে, সমগ্ৰ দেশত এতিয়ালৈ ৪৭৮৯ গৰাকী লোক ক’ৰ’না ভাইৰাছত আক্ৰান্ত হোৱাৰ বিপৰীতে ১২৪ গৰাকী লোক এই ভাইৰাছ বিধৰ সংক্ৰমণৰ ফলত মৃত্যু মুখত পৰিছে।