কেতিয়াৰ পৰা খুলিব চৰকাৰী কাৰ্যালয়? মুকলি হ’ব নে সুৰাৰ বিপণী? কি সিদ্ধান্ত ল’লে ৰাজ্যিক কেবিনেটে?

ল’কডাউন সন্দৰ্ভত আজি খানাপাৰাস্থিত অসম প্ৰশাসনীয় পদাধিকাৰী আইন মহাবিদ্যালয়ত অনুষ্ঠিত হয় ৰাজ্যিক কেবিনেটৰ বৈঠক। সেই বৈঠকত ৰাজ্য চৰকাৰে গ্ৰহণ কৰে কেতবোৰ সিদ্ধান্ত।

বৈঠকৰ অন্তত কেন্দ্রীয় চৰকাৰৰ যি নীতি নির্দেশনা সেয়াই  অসমতো প্রযোজ্য হ’ব বুলি মন্তব্য উদ্যোগ মন্ত্ৰী চন্দ্ৰ মোহন পাটোৱাৰীৰ। ৰাজ্য চৰকাৰে নিজে কোনোধৰণৰ সিদ্ধান্ত নলয় বুলিও মন্তব্য কৰে পাটোৱাৰীয়ে।

“লকডাউনক লৈ অসম চৰকাৰৰ নিজা কোনো সুকীয়া সিদ্ধান্ত নাই।” পাটোৱাৰীয়ে এইদৰে কয়।

সুৰাৰ বিপনী খোলা নোখোলাক লৈ কেবিনেটে কোনো সিদ্ধান্ত লোৱা নাই বা আলোচনা কৰা নাই বুলি তেওঁ সদৰী কৰে।

ইপিনে এই সন্দৰ্ভত বৈঠকৰ অন্তত প্ৰতিক্ৰিয়া প্ৰকাশ কৰি আৱকাৰী মন্ত্ৰী পৰিমল শুক্লবৈদ্যই কয়, ৰাজ্য চৰকাৰৰ কেবিনেটত সুৰাৰ বিপণী মুকলি কৰাৰ কোনো সিদ্ধান্ত গ্ৰহণ কৰা নাই। এই ক্ষেত্ৰত কেন্দ্ৰীয় চৰকাৰৰ সিদ্ধান্তকে মানি ল’ব।

আনহাতে, উক্ত কেবিনেট বৈঠকৰ অন্তত জলসিঞ্চন মন্ত্ৰী ভৱেশ কলিতাই অহা ১৫ এপ্ৰিল বা ব’হাগ বিহুৰ পাছৰ পৰা ৰাজ্যৰ চৰকাৰী কাৰ্য্যালয় সমূহ মুকলি কৰাৰ ইংগিত দিয়ে।

তেওঁ কয় ‘কেন্দ্ৰীয় চৰকাৰৰ নিৰ্দেশ মতে আমি ল’কডাউনটো মানি আছো। যদি কেন্দ্ৰীয় চৰকাৰে বৃদ্ধি কৰে তেন্তে আমি মানিব লাগিব। কাইলৈ অৰ্থ্যাৎ ১৩ এপ্ৰিলৰ সন্ধিয়াৰ ভিতৰত আমি গম পাম আৰু কিমান দিন এই ল’কডাউন বৃদ্ধি কৰে। এই বৃদ্ধিটো zone ভেদে অলপ বেলেগ ধৰণৰ হ’ব পাৰে। অসমে কিছু ক্ষেত্ৰত ৰেহাই পাব পাৰে, কিয়নো ব’হাগ মাহত খেতিৰ কথা আছে। ল’কডাউন মানি চলিব লাগিব আৰু উন্নয়নৰ কামো কৰিব লাগিব। ১৫ এপ্ৰিলৰ পাছত অৰ্থ্যাৎ বিহুৰ পাছতে ৰাজ্যৰ কাৰ্য্যালয়সমূহ খোলাৰ পূৰ্ণ সম্ভাৱনা আছে। কিমান আৰু বিহু গাই থাকিম? ল’কডাউনৰ মাজতে সামাজিক ব্যৱধান মানি চলিলে কিছু কাম কৰিব পৰা যায়।‘

তেওঁৰ এই মন্তব্যৰ পৰা স্পষ্ট হৈ পৰিছে যে অহা ১৫ এপ্ৰিলৰ পৰা সামাজিক ব্যৱধান মানি অৰ্থ্যাৎ ৫০ শতাংশ বিষয়া কৰ্মচাৰীৰ উপস্থিতিৰে চলি যাব চৰকাৰী কাৰ্য্যালয়ৰ কাম।