শিৰীষ মহোৎসৱত মুখ্য অতিথি হিচাপে অংশ গ্ৰহণ মুখ্য মন্ত্ৰী সৰ্বানন্দৰ

‘অসমৰ আৰ্থ-সামাজিক উত্তৰণৰ ক্ষেত্ৰত চাহ জনগোষ্ঠীৰ শক্তিশালী ভূমিকা আছে। চাহ জনগোষ্ঠীৰ লোকসকলে নিজৰ দক্ষতা আৰু যোগ্যতাৰ বিশ্ব বুকুত এক সুকীয়া স্থান লাভ কৰিবলৈ সক্ষম হৈছে। এক কৰ্মদ্যোগী জনগোষ্ঠী হিচাপে আমাৰ সমাজ জীৱনক সুকীয়া মৰ্যাদা দিবলৈও সক্ষম হৈছে। দুশ বছৰীয়া চাহৰ ইতিহাসেৰে বিশ্বত অসমৰ যি পৰিচয় সেয়া চাগ জনগোষ্ঠীৰ বৰঙণিৰ বাবেহে সম্ভৱ হৈছে।’ আজি কলিয়াবৰ সমষ্টিৰ মিছাত এ পি পি এল ফাউণ্ডেশ্যনৰ উদ্যোগত মিছা উচ্চ মাধ্যমিক বিদ্যালয়ৰ খেলপথাৰত আয়োজিত চতুৰ্থ ‘শিৰীষ’ মহোৎসৱৰ সামৰণি অনুষ্ঠানত মুখ্য অতিথি হিচাপে অংশ গ্ৰহণ কৰি মুখ্য মন্ত্ৰী সৰ্বানন্দ সোণোৱালে এইদৰে কয়।

মুখ্য মন্ত্ৰী গৰাকীয়ে আজি এই মহোৎসৱত বিশিষ্ট সাহিত্যিক সুশীল কুৰ্মীক ‘শিৰীষ সাহিত্য বঁটা’ আৰু বিশিষ্ট শিল্পী দুলাল মান্তিক ‘শিৰীষ সাংস্কৃতিক বঁটা’ প্ৰদান কৰে। মুখ্য মন্ত্ৰী গৰাকীয়ে লগতে কয় যে, ‘এই দুয়োগৰাকী ব্যক্তিয়ে আমাৰ সাহিত্য আৰু সাংস্কৃতিক জীৱনৰ সৌস্থৱ বৃদ্ধি কৰিছে। এই দুগৰাকী ব্যক্তিয়ে আমাৰ জাতিসত্ত্বা আৰু সামাজিক চিন্তাধাৰা সাহিত্য আৰি সংস্কৃতিৰ মাজেৰে বিকশাই তুলি আমাৰ সমাজ জীৱনত নতুন শক্তি প্ৰদান কৰিছে।’

জলসম্পদ মন্ত্ৰী কেশৱ মহন্ত, শিৰীষ বঁটা প্ৰাপক সুশীল কুৰ্মী আৰু দুলাল মান্তিয়ে ভাষণ প্ৰদান কৰা অনুষ্ঠানটোত মুখ্য মন্ত্ৰীয়ে সাংস্কৃতিক প্ৰতিযোগিতাত বিজয়ী সকলক পুৰস্কৃত কৰে।

উক্ত অনুষ্ঠানটোত বিধায়ক তপন গগৈ, এ পি পি এলৰ পৰিচালন সঞ্চালক জগজিৎ সিং কান্দাল, এ পি পি এলৰ মেনেজিং ট্ৰাষ্টি ধীৰজ কাকতি, এ পি পি এলৰ অধ্যক্ষ ৰঞ্জিত ঠাকুৰ, নগাঁও জিলাৰ উপায়ুক্ত বিশ্বজিৎ পেগুকে ধৰি বহু গণ্য-মান্য ব্যক্তি উপস্থিত থাকে।