মুকেশ আম্বানিয়ে ত্যাগ কৰিলে সম্পূৰ্ণ দৰমহা, ৫০%লৈকে কৰ্তন শীৰ্ষ বিষয়াৰ

ৰিলায়েন্স ইণ্ডাষ্ট্ৰিজৰ হাইড্ৰ’কাৰ্বন ডিভিজনে কৰ’নাভাইৰাছৰ বাবে সৃষ্টি হোৱা সংকটৰ পৰিপ্ৰেক্ষিতত শীৰ্ষ বিষয়াসকলৰ দৰমহা কৰ্তনৰ সিদ্ধান্ত গ্ৰহণ কৰিছে।

ৰিলায়েন্স ইণ্ডাষ্ট্ৰিজৰ মুৰব্বী মুকেশ আম্বানিয়ে তেওঁৰ সম্পূৰ্ণ দৰমহা ত্যাগ কৰিছে।

কোম্পানিটোৱে বছৰি ১৫ লাখতকৈ কম টকা দৰমহা পোৱা কৰ্মচাৰীসকলৰ দৰমহা কৰ্তন নকৰাৰো সিদ্ধান্ত হৈছে।

বছৰি ১৫ লাখতকৈ অধিক দৰমহা পোৱাসকলৰ ১০শতাংশকৈ দৰমহা কৰ্তনৰ সিদ্ধান্ত কৰা হৈছে।

বিপৰীতে কোম্পানিটোৰ শীৰ্ষ কাৰ্য্যবাহীসকলৰ ক্ষেত্ৰত দৰমহা ৩০ৰ পৰা ৫০ শতাংশ কৰ্তনৰ সিদ্ধান্ত কৰা হৈছে।

বাতৰি মতে, যোৱা ২৯ এপ্ৰিলত কোম্পানিটোৱে কৰ্মচাৰীসকলৰ বাবে এই নোট জাৰি কৰিছে।

হাইড্ৰ’কাৰ্বন ব্যৱসায়ত শেহতীয়াকৈ হঠাতে চাহিদা কমি যোৱাৰ বাবে কোম্পানিটোৱে পৰিচালনা ব্যয় আৰু নিৰ্ধাৰিত ব্যয়সমূহৰ ক্ষেত্ৰত চকু দিব লগা হৈছে।

দৰমহা কৰ্তনৰ লগতে কোম্পানিটোৱে সাধাৰণতে বিত্তীয় বৰ্ষৰ প্ৰথম চাৰিমাহত দিয়া বাৰ্ষিক কেশ্ব ব’নাছ আৰু প্ৰদৰ্শন-ভিত্তিক ইনচেণ্টিভো পিছুৱাই দিছে।