ইজৰাইলে বনালে ক’ৰ’না ভাইৰাছৰ ভেকশ্যিন; অতি শীঘ্ৰে উৎপাদন আৰম্ভ কৰাৰ দাবী

ক’ৰ’না ভাইৰাছৰ সংহাৰে সমগ্ৰ বিশ্বতে আতংকৰ সৃষ্টি কৰাৰ সময়তে ইজৰাইলৰ পৰা আহিছে এটা ভাল খবৰ। ইজৰাইলে নিজৰ বায়’লজিকেল লেবত নিৰ্মাণ কৰি উলিয়াইছে ক’ভিদ-১৯ৰ ভেকশ্যিন।

ইজৰাইলৰ প্ৰতিৰক্ষা মন্ত্ৰী নেফতালী বেনেটে এই কথা জানিবলৈ দি ক’ৰ’নাৰ চিকিৎসাৰ ক্ষেত্ৰত এয়া এক বৃহৎ সফলতা বুলি অভিহিত কৰিছে।

তেওঁৰ কাৰ্যালয়ৰ তৰফৰ পৰা জনোৱা অনুসৰি ইজৰাইলৰ বায়’লজিকেল ৰিচাৰ্ছ সংস্থাই ম’ন’ক্ল’নল নিউট্ৰিলাইজিং এণ্টি বডি নিৰ্মাণ কৰি উলিয়াইছে। এই এণ্টি বডিয়ে যিকোনো ব্যক্তিৰ শৰীৰত থকা ক’ভিদ-১৯ নিৰ্মূল কৰিব বুলি দাবী কৰিছে দেশখনে।

ক’ভিদ-১৯ৰ ভেকশ্যিন নিৰ্মাণ কৰা এই লেবটো ইজৰাইলৰ এটা গোপন লেব। এই লেবটোৰ কাম-কাজ প্ৰধান মন্ত্ৰীৰ প্ৰত্যক্ষ তত্বাৱধানত চলে।

ইজৰাইলে বৰ্তমান এই ভেকশ্যিনৰ পেটেণ্টৰ প্ৰক্ৰিয়াত ব্যস্ত আছে আৰু অতি শীঘ্ৰে উদ্যোগসকলক এই ভেকশ্যিনবিধ উৎপাদনৰ বাবে ক’ব বুলিও জনায়।

ইজৰাইলৰ লেব IIBR এ যিটো এণ্টি বডি নিৰ্মাণ কৰিছে সেইটো ম’ন’ক্ল’নল বুলি কোৱা হৈছে। এই সন্দৰ্ভত কৈ থকা হৈছে যে এইটো একমাত্ৰ এনেকুৱা কোষৰ পৰা লোৱা হৈছে যি বেমাৰ হোৱাৰ পৰা সুস্থ হৈছে।

ইয়াৰ পূৰ্বে এটাতকৈও অধিক কোষৰ পৰা ক’ৰ’না ভাইৰাছৰ এণ্টি বডি নিৰ্মাণ কৰাৰ চেষ্টা চলাইছিল।

উল্লেখ্য যে ইজৰাইলত ক’ৰ’না ভাইৰাছত ১৬২৪৬ গৰাকী লোক আক্ৰান্ত হৈছে আৰু ২৩৫ গৰাকী লোক মৃত্যুমুখত পৰিছে।