ল’কডাউনৰ সামৰণি পৰাৰ পাছতে দেশৰ আগশাৰীৰ ক্ৰীড়াবিদ সকলৰ প্ৰশিক্ষণ আৰম্ভ হ’ব : কিৰেণ ৰিজিজু

ক’ৰ’নাৰ সংক্ৰমণ ৰোধৰ বাবে ঘোষণা কৰা ল’কডাউন সমাপ্ত হোৱাৰ পাছতে দেশৰ আগশাৰীৰ ক্ৰীড়াবিদ সকলৰ প্ৰশিক্ষণ পুনৰ আৰম্ভ হ’ব বুলি কেন্দ্ৰীয় ক্ৰীড়া মন্ত্ৰী কিৰেণ ৰিজিজুই সদৰী কৰে।

পৰৱৰ্তী সময়ত পৰ্যায়ক্ৰমে দেশৰ ছাইৰ অধীনৰ ক্ৰীড়া প্ৰকল্প সমূহতো ক্ৰীড়াৰ প্ৰশিক্ষণ আৰম্ভ কৰা হ’ব বুলি ৰিজিজুই জানিবলৈ দিয়ে।

‘‘আমি এবাৰ ল’কডাউনৰ সামৰণি পৰাৰ পাছত আগশাৰীৰ ক্ৰীড়াবিদ সকলৰ প্ৰশিক্ষণ আৰম্ভ কৰিম আৰু পৰ্যায়ক্ৰমে ছাই প্ৰশিক্ষণ কেন্দ্ৰ সমূহ খোলাৰ ব্যৱস্থা কৰিম,’’  কিৰেণ ৰিজিজুই এনেদৰে কয়।

‘‘দুৰ্যোগ প্ৰশমন আইনৰ অধীনত ক্ৰীড়া প্ৰতিযোগিতাসমূহে কোনোধৰণৰ ৰেহাই লাভ নকৰে। আমি অত্যাৱশ্যকীয় সেৱাৰ অধীনত নপৰো,’’ দেশৰ ক্ৰীড়া মন্ত্ৰী গৰাকীয়ে লগতে কয়।

ভাৰতত বৰ্তমানলৈ ৬৭,০০০ অধিক লোক ক’ৰ’না ভাইৰাছত আক্ৰান্ত হৈছে।

আনহাতে, দেশত এতিয়ালৈ ২০,০০০ কৈ অধিক লোক চিকিৎসাৰ অন্তত ক’ৰ’নাৰ পৰা আৰোগ্য লাভ কৰি ঘৰলৈ উভতিছে।

দেশৰ ক্ৰীড়া প্ৰশিক্ষণ প্ৰতিষ্ঠান সমূহত যাতে কোনোকাৰণতে ক’ৰ’না ভাইৰাছৰ সংক্ৰমণ হ’ভ নোৱাৰে আৰু খেলুৱৈ সকল সম্পূৰ্ণ সুস্থ হৈ থাকে তাৰবাবে ক্ৰীড়া মন্ত্ৰ্যালয়ে বিশেষ পদক্ষেপ গ্ৰহণ কৰিছে বুলিও ৰিজিজুই লগতে কয়।