হাফলং কোৱাৰেন্টাইন কেন্দ্রত নিম্ন মানৰ খাদ্য যোগানৰ অভিযোগ

ক’ভিড-১৯ প্রতিৰোধৰ কাৰণে চৰকাৰে দিনে নিশাই কাম কৰি থকাৰ সময়তে একাংশ চৰকাৰী বিষয়া কৰ্মচাৰীয়ে নিজৰ মুনাফা আদায়ত ব্যস্ত হৈ থকা পৰিলক্ষিত হৈছে।

শেহতীয়াকৈ পাহাৰীয়া জিলাৰ ডিমা হাচাওৰ হাফলঙত স্থাপন কৰা কোৱাৰেণ্টাইন চেণ্টাৰত ভৰ্তি হৈ থকা লোকসকলৰ লগতে স্বাস্থ্য কৰ্মীসকলক পুষ্টিকৰ খাদ্য যোগান নধৰাৰ অভিযোগ উত্থাপন হৈছে।

চৰকাৰী গাইড লাইন অনুসৰি কোৱাৰেণ্টাইন চেণ্টাৰ সমূহত পুষ্টিকাৰক খাদ্য যোগান ধৰা বাধ্যতামূলক যদিও বাস্তৱত সেয়া হৈ উঠা পৰিলক্ষিত হোৱা নাই।

যাৰ বাবে কোৱাৰেন্টাইন চেন্টাৰৰ উপৰি ক’ভিডৰ কাৰণে নিজৰ জীৱন নেওচি কাম কৰা চিকিৎসক বা স্বাস্থ্য কৰ্মী সকলে ভাত, পানী সদৃশ ডালি, আলুভাজি, পনিৰৰ ব্যঞ্জন খাই ভোক নিবাৰণ কৰিব লগা হৈছে।

উল্লেখ্য যে এই খাদ্য যোগানৰ দায়িত্বত আছে জিলা উপায়ুক্তৰ কার্যালয়। প্রাপ্ত তথ্য অনুসৰি ডিমা হাচাও জিলাৰ ক’ভিড-১৯ৰ ন’ডেল অফিচাৰ ইবন টেৰনৰ তত্ত্বাবধানত চলি আছে খাদ্য যোগান প্ৰক্ৰিয়া।

এগৰাকী স্বাস্থ্য কর্মীৰ ভাষ্য অনুসৰি চৰকাৰীভাৱে যোগান ধৰা খাদ্য অতি নিম্নমানৰ। পুষ্টিকাৰক নহয়। এনে ধৰণৰ সমস্যাৰ সন্মুখীন হৈ দিনে নিশাই কাম কৰি থকা স্বাস্থ্য কৰ্মী সকলে বিষয়টোত গুৰুত্ব দিবলৈ জিলা উপায়ুক্তৰ দৃষ্টি আকৰ্ষণ কৰে।