ৰাজ্যত পাঁচশ অতিক্ৰম ক’ৰ’না ৰোগীৰ সংখ্যা; আজিৰ দিনটোত ১২২ গৰাকী আক্ৰান্ত

অসমত পুনৰ ৪৮ গৰাকী ব্যক্তিৰ দেহত ক’ভিড-১৯ পজিটিভ চিনাক্ত হৈছে, ইয়াৰ সৈতে ৰাজ্যত বৰ্তমানলৈকে আক্ৰান্ত ৰোগীৰ সংখ্যা ৫১৪ লৈ বৃদ্ধি পায়।

ইয়াৰে ১৬ গৰাকী কৰিমগঞ্জ, ৮ গৰাকী লখিমপুৰ, ৮ গৰাকী গুৱাহাটীৰ (কোনো কোৱাৰেন্টাইন চেণ্টাৰৰ), ৫ গৰাকী কাছাৰ, ৪ গৰাকী হাইলাকান্দি, ৩ গৰাকী দক্ষিণ শালমৰা, ২ গৰাকী নলবাৰী, এগৰাকী মৰিগাঁও আৰু এগৰাকী গোৱালপাৰাৰ।

আজিৰ দিনটোত ৰাজ্যত ১২২ গৰাকী লোক নতুনকৈ আক্ৰান্ত হৈছে এই মাৰাত্মক ভাইৰাছত। এই সংখ্যা বৰ্তমানলৈকে এদিনত চিনাক্ত হোৱা সৰ্বাধিক সংখ্যা।

টুইটাৰযোগে এই কথা উল্লেখ কৰিছে স্বাস্থ্য মন্ত্ৰী ড০ হিমন্ত বিশ্ব শৰ্মাই।

দেওবাৰৰ দিনটোত ৩২ গৰাকী লোক ক’ৰ’নাত আক্ৰান্ত হৈছিল।

বৰ্তমান ৪৪৫ গৰাকী লোক এই ক’ৰ’না ভাইৰাছত আক্ৰান্ত হৈ চিকিৎসাধীন হৈ আছে তাৰ বিপৰীতে ৫৭ জনক চিকিৎসালয়ৰ পৰা মুক্তি দিয়া হৈছে।

এতিয়ালৈ চাৰিগৰাকী লোক মৃত্যু মুখত পৰিছে।

ৰাজ্যত পাঁচদিনৰ ভিতৰত তিনি শতাধিক লোক ক’ভিড-১৯ ত আক্ৰান্ত হৈছে।

উল্লেখযোগ্য যে, যোৱা ১৩ মে’ ৰ পৰা আজিলৈকে মুঠ ৪৩৯ গৰাকী লোক আক্ৰান্ত হৈছে এই মাৰাত্মক ক’ভিড-১৯ত।