হোৱাইট হাউছৰ বাহিৰত হিংসাত্মক বিক্ষোভ; বাংকাৰত লুকাল ৰাষ্ট্ৰপতি ডোনাল্ড ট্ৰাম্প!

আমেৰিকাৰ ২০খনতকৈয়ো অধিক চহৰত কৃষ্ণাংগ নগৰিকৰ মৃত্যুক কেন্দ্ৰ কৰি কেইবাদিন ধৰি বিক্ষোভ প্ৰদৰ্শন চলি আছে।

বাতৰি অনুসৰি, ৱাশ্বিংটনত হোৱাইট হাউছৰ বাহিৰত সহস্ৰাধিক লোকে বিক্ষোভ প্ৰদৰ্শন কৰাৰ সময়তে ৰাষ্ট্ৰপতি ডোনাল্ড ট্ৰাম্পে সুৰক্ষিত স্থান বিচাৰি এটা বাংকাৰলৈ যাবলগীয়া হৈছিল।

অৱশ্যে, তেওঁৰ সুৰক্ষাৰ প্ৰতি কোনো ভাবুকি নাই বুলি জানিব দিছে বিষয়াসকলে।

‘দ্য গাৰ্ডিয়ান’ৰ বাতৰি অনুসৰি, ট্ৰাম্পে ‘পলাই’ বাংকাৰত আশ্ৰয় ল’বলগীয়া হৈছিল।

ছচিয়েল মিডিয়াতো বহু বিক্ষোভ কৰ্মীয়ে ট্ৰাম্পে পলাই গৈ বাংকাৰত লুকোৱা বুলি প্ৰকাশ কৰিছে।

বাতৰি অনুসৰি, শুকুৰবাৰে নিশা চিক্ৰেট চাৰ্ভিছ এজেন্টৰ পৰামৰ্শ অনুসৰি ট্ৰাম্পে বাংকাৰলৈ যায় আৰু প্ৰায় এঘন্টা তেওঁ বাংকাৰতে কটায়।

কৃষ্ণাংগ নাগৰিকৰ মৃত্যুক কেন্দ্ৰ কৰি বিক্ষোভ প্ৰদৰ্শন কৰা প্ৰতিবাদীসকলে কেইবাখনো চহৰত হিংসাত্মক ঘটনা সংঘটিত কৰে।

হোৱাইট হাউছৰ বাহিৰতো বিক্ষোভকাৰীসকলে শিলাবৰ্ষণ কৰে।

উল্লেখযোগ্য যে হোৱাইট হাউছত জৰুৰীকালীন সন্ত্ৰাসজনক পৰিস্থিতিত সুৰক্ষাৰ বাবে বাংকাৰ নিৰ্মাণ কৰা হৈছে।

ইপিনে, শনিবাৰে নিশাৰ ঘটনাৰ পাছত দেওবাৰে নিশাও বিক্ষোভকাৰীসকলে হোৱাইট হাউছৰ সন্মুখত উপস্থিত হয়। পৰিস্থিতিলৈ লক্ষ্য কৰি মেয়ৰে নিশা ১১বজাৰ পাছত কাৰ্ফিউ জাৰি কৰা হয়।

উল্লেখ্য যে যোৱা সোমবাৰেই আৰক্ষীৰ জিম্মাত এজন কৃষ্ণাংগ নাগৰিক জৰ্জ ফ্লয়েডৰ মৃত্যু হৈছিল। তেওঁৰ ন্যায়া বিচাৰি আমেৰিকাত বিক্ষোভ প্ৰদৰ্শন চলি আছে।