শিবিৰ এৰি পলায়ন কৰা সদস্যৰ প্ৰতি দায়ৱদ্ধ নহয় আলফা(স্বা) : স্থিতি স্পষ্ট কৰিলে সংগঠনটোৱে

সংযুক্ত মুক্তি বাহিনী অসম(স্বাধীন)ৰ শিবিৰ এৰি পলায়ন কৰা কোনো সদস্যৰ প্ৰতি বিদ্ৰোহী সংগঠনটো দায়ৱদ্ধ নহয়।

সংবাদ মাধ্যমলৈ প্ৰেৰণ কৰা এক প্ৰেছ বিবৃত্তি আৰু ভিডিঅ’যোগে এই কথা প্ৰকাশ কৰিছে সংযুক্ত মুক্তি বাহিনী অসম(স্বাধীন)এ।

সংবাদ মাধ্যমলৈ প্ৰেৰণ কৰা বিবৃত্তি আৰু ভিডিঅ’টোত বিদ্ৰোহী সংগঠনটোৰ প্ৰচাৰ সদস্য কে. দীপ অসমে কয় যে ডিব্ৰুগড় জিলাৰ কোটোহাৰ কৰ্প’ৰেল বিমান অসমে দুজন সতীৰ্থ সৈতে যোৱা ২০১৯ৰ ২ ফেব্ৰুৱাৰিৰ দিনাই অস্ত্ৰ-সস্ত্ৰসহ শিবিৰ এৰি পলায়ন কৰিছিল।

প্ৰচাৰ গোটৰ সদস্য দীপ অসমৰ মতে চৰাইদেউ জিলাৰ লখুৰাখন গাঁৱৰ চাৰ্জেন্ট মেজৰ বীৰু অসম ওৰফে ভাগীশ গগৈ আৰু গোলাঘাটৰ কৰ্প’ৰেল কৰুণা অসম ওৰফে গঙ্গাধৰ মিলিৰ সৈতে লগ লাগি আলফা(স্বা)ৰ মোবাইল শিবিৰ পৰা এটা এ কে ৪৭, এটা এ কে ৫৬(টাইপ-২), এটা এ কে-৮১ আৰু ৯ টা মেগজিনসহ ৬০০ গুলী, ৬ টা গ্ৰেণেড আৰু ৩ ৱাকিটকীৰসহ পলায়ন কৰিছিল।

পলায়ন কৰাৰ পিছতে বীৰু অসম আৰু কৰুণা অসমে অসম আৰক্ষীৰ ওচৰত আত্মসমৰ্পণ কৰে যদিও বিমান অসম তেতিয়াৰ পৰাই সন্ধানহীন হৈ আছে।

বিবৃত্তি আৰু ভিডিঅ’যোগে বিদ্ৰোহী সংগঠনটোৱে স্থিতি স্পষ্ট কৰি কয় যে, অস্ত্ৰ-সস্ত্ৰসহ পলায়ন কৰাৰ পিছৰে পৰা বিমান অসমৰ কোনো তথ্য সংগঠনটোৰ লগত নাই।

আনকি সংগঠনটোৱে জনাই যে এইদৰে পলায়ন কৰা কোনো সদস্যৰ প্ৰতি বিদ্ৰোহী সংগঠনটো দায়ৱদ্ধ নহয় বুলি মন্তব্য কৰি পৰিয়ালৰ লোকক এই সংক্ৰান্তত আত্মসমৰ্পণ কৰা আলফা(স্বা)ৰ প্ৰাক্তন দুই সদস্য আৰু আৰক্ষীৰ সৈতে যোগাযোগ কৰিবলৈ আহ্বান জনাইছে।