অশ্লীল ভিডিঅ’ বনাব নিদিয়াৰ বাবেই পত্নীক অত্যাচাৰ; শিৱসাগৰত ৰঙাঘৰত সোমাল স্বামী

মোবাইলত অশ্লীল ভিডিঅ’ বনোৱাৰ প্রতিবাদ কৰাৰ বাবেই শিৱসাগৰৰ এজন লোকে নিজৰ পত্নীৰ ওপৰত অমানুষিক অত্যাচাৰ চলাই ৰঙাঘৰৰ আলহী হোৱা এক ঘটনা সংঘটিত হৈছে।

পত্নীৰ ওপৰত নিৰ্যাতন চলাই অহা এই লোকজন হৈছে শিৱসাগৰ জিলাৰ বালিঘাটৰ নিৱাসী ফিৰোজ আলম হুছেইন।

জানিব পৰা মতে ফিৰোজ আলম শিলৰ চোৰাং ব্যৱসায়ৰ লগত জড়িত।

উল্লেখযোগ্য যে যোৱা ১৩ মাৰ্চত সম্পূৰ্ণ ধৰ্মীয় ৰীতি-নীতিৰে ভুক্তভোগী যুৱতীগৰাকীক বিয়া কৰাইছিল। অভিযোগ মতে বিবাহৰ দুদিনৰ পৰাই ফিৰোজে পত্নীৰ ওপৰত শাৰিৰীক আৰু মানসিক অত্যাচাৰ আৰম্ভ কৰিছিল।

গোপনে পত্নীৰ লগত কটোৱা অন্তৰংগ মুহূৰ্তৰ ভিডিঅ’ কৰিছিল ফিৰোজে। স্বামীৰ এনে কাৰ্যৰ বিৰোধিতা কৰাৰ বাবে লোকজনে পত্নীৰ ওপৰত চলাইছিল শাৰিৰীক আৰু মানসিক অত্যাচাৰ।

আনকি পত্নীক শাৰিৰীক নিৰ্যাতন চলোৱাৰ উপৰিও জোৰজবৰদস্তি গৰ্ভপাত কৰাৰো গুৰুতৰ অভিযোগ আছে ফিৰোজৰ বিৰুদ্ধে।

ইয়াৰ উপৰি পত্নীক শিৱসাগৰৰ জেঙনীকটীয়াৰ ভাৰাঘৰত এৰি পুনৰ আন এগৰাকী যুৱতীৰ লগত বিবাহত বহাৰ চেষ্টা চলোৱা বুলিও ফিৰোজৰ বিৰুদ্ধে অভিযোগ উঠিছে।

অৱশেষত উপায়ন্তৰ পত্নীয়ে শিৱসাগৰ আৰক্ষীৰ কাষ চপাত আজি আৰক্ষীয়ে ভাৰতীয় দণ্ডবিধি আইনৰ ৪৯৮ (এ)/৩১৩ ধাৰাৰ অধীনত ৬৪৭/২০২০ নম্বৰৰ এক গোচৰ ৰুজু কৰি লোকজনক গ্ৰেপ্তাৰ কৰে।