পাকিস্তান ষ্টক এক্সচেঞ্জত বন্দুকধাৰীৰ ভয়ংকৰ আক্ৰমণ; ৪জন আক্ৰমণকাৰীকে ধৰি ৯জন নিহত

পাকিস্তানৰ কৰাচীত থকা পাকিস্তান ষ্টক এক্সচেঞ্জত বন্দুকধাৰীয়ে সোমবাৰে আক্ৰমণ চলায়।

বাতৰি অনুসৰি, পাকিস্তান ষ্টক এক্সচেঞ্জৰ বিল্ডিঙত চাৰিজন বন্দুকধাৰী প্ৰৱেশ কৰি যধেমধে গুলীচালনা কৰে।

অৱশ্যে, চাৰিওজন আক্ৰমণকাৰীকে গুলীয়াই নিহত কৰা হৈছে।

আনহাতে, আক্ৰমণকাৰীৰ গুলীচালনাৰ ফলত ৫জন লোক নিহত হোৱা বুলি জানিব পৰা গৈছে।

পাকিস্তানী সংবাদ মাধ্যমৰ বাতৰি অনুসৰি কৰাচীৰ আৰক্ষী মহা পৰিদৰ্শকে পৰিস্থিতি নিয়ন্ত্ৰিত আৰু চাৰিওগৰাকী আক্ৰমণকাৰীকে গুলীয়াই নিহত কৰা বুলি দাবী কৰে।

আক্ৰমণকাৰী কেইজনে আৰক্ষী বিষয়াৰ তেনে পোছাক পিন্ধি আহিছিল যিটো তেওঁলোকে অফ ডিউটিৰ সময়ত পিন্ধে।

আক্ৰমণকাৰীকেইজনে অত্যাধুনিক অস্ত্ৰৰে আক্ৰমণ চলাইছিল আৰু এটা বেগ কঢ়িয়াই আনিছিল য’ত বিস্ফোৰক থকা বুলি অনুমান কৰা হৈছে।

আক্ৰমণকাৰীকেইজনে ষ্টক একচেঞ্জৰ বিল্ডিঙৰ মূল প্ৰৱেশদ্বাৰত প্ৰথমতে গ্ৰেনেডেৰে আক্ৰমণ চলায় আৰু তাৰ পাছত যধেমধে গুলীচালনা কৰি ভিতৰত সোমায়।

আক্ৰমণকাৰীৰ গুলীচালনাৰ ফলত এগৰাকী আৰক্ষী বিষয়া আৰু এগৰাকী সুৰক্ষা কৰ্মী আহত হোৱা বুলি কোৱা হৈছে।

আনহাতে, সঠিক সময়ত আৰক্ষী আৰু ৰেঞ্জাৰ্ছৰ জোৱান ঘটনাস্তলীত গৈ উপস্থিত হৈ আক্ৰমণকাৰীক প্ৰত্যুত্তৰ দিয়ে।

পাকিস্তান ষ্টক একচেঞ্জৰ আশে পাশে থকা অঞ্চলসমূহ খালী কৰা হৈছে। আহতসকলক ততাতয়াকৈ ওচৰৰ হাস্পাতলত ভৰ্তি কৰা হয়।

আৰক্ষী তথা সুৰক্ষা বাহিনীয়ে ঘটনাৰ তদন্ত অব্যাহত ৰাখিছে।