অসমীয়াৰ বিড়ম্বনা! ধৰ্মৰক্ষকৰ ৰোষত পৰিল ব্ৰয়লাৰ পালন কৰা উদ্যোগী যুৱক

ধৰ্ম ৰক্ষকৰ ৰোষত পৰিল যোৱা বৰ্ষৰ নৱেম্বৰ মাহত মুম্বাইৰ পৰা স্বগৃহলৈ উভতি আহি ব্ৰয়লাৰ ফার্ম খুলি জীৱিকা নিৰ্বাহ কৰা এজন উদ্যোগী যুৱক।

শ্ৰীমন্ত শংকৰদেৱ সংঘৰ দ্বাৰা ‘নিষিদ্ধ’ ঘোষিত পক্ষী ব্ৰয়লাৰ পালন কৰাৰ বাবেই লখিমপুৰ নাৰায়ণপুৰৰ কমলপুৰ শাখাৰ পৰা সহযোগ বিচ্ছিন্ন কৰা হ’ল সৰুল’ৰা বৰা আৰু তেওঁৰ পৰিয়ালটোক। অৰ্থ্যাৎ পুত্ৰ সুনীল বৰাই ব্ৰয়লাৰ ফার্ম খুলি উপাৰ্জনৰ পথ মোকলাই লোৱাটোৱেই অপৰাধ হ’ল সৰুল’ৰা বৰাৰ।

বিগত ১৫-১৬ বছৰে শ্ৰীমন্ত শংকৰদেৱ সংঘৰ লগত ওতঃপোতঃভাৱে জৰিত হৈ থকা সৰুল’ৰা বৰাক কমলপুৰ প্ৰাথমিকৰ সভাপতি অমূল্য বৰা আৰু সম্পাদক দিলীপ বৰা স্বাক্ষৰ সম্বলিত এখন পত্ৰৰ জৰিয়তে সাময়িকভাৱে শাখাৰ পৰা বহিস্কাৰ কৰাৰ কথা উল্লেখ কৰে।

তাৰ পাছতে মূৰত সৰগ খহি পৰা যেন অৱস্থাৰ সৃষ্টি হয় অসহায় সৰুল’ৰা বৰাৰ।

ফেইচবুকত ইতিমধ্যে ভাইৰেল হৈ পৰা এটা ভিডিঅ’ত সৰুল’ৰা বৰাই কয়, ‘আমাৰ খেতি-বাতি কৰিবলৈ মাটি-পথাৰ তেনেকৈ নাই। আমাৰ ল’ৰাটোৰ অকলেও নহয়, লগত আৰু তিনিটা ল’ৰাই মিলি খুলিছে। ইহঁতৰ নিজৰো নহয়, কোম্পানীয়ে ব্ৰয়লাৰ বিলাক লৈ যায়হি, ৩০-৩৫ দিন পাছত। সেই কথাটোত মই সন্মতি দিছো কিয়নো মোৰ বাৰীৰ ভিতৰত নহয়।‘

তেওঁ লগতে কয়, ‘মোক এঘৰীয়া কৰা হৈছে। প্ৰাথমিকৰ ভকতে কৈছে তেওঁলোকে আঞ্চলিকক জনাইছিল, আঞ্চলিকে এইটো মানি নল’লে আইনৰ বাহিৰত বুলি ক’লে।‘

ইপিনে, অন্য এটা ভিডিঅ’ত সৰুল’ৰা বৰাৰ কনিষ্ঠ পুত্ৰ সুনীল বৰাই কয়, ‘আমাক এঘৰীয়া কৰাৰ পাছত আমি একপ্ৰকাৰে মানসিকভাৱে ভাগি পৰছিলো। গাঁৱলৈ ওলাই গ’লে প্ৰত্যেকৰে এটাই প্ৰশ্ন আমাক কিয় এঘৰীয়া কৰা হ’ল? মোৰ দেউতা ১৫-১৬ বছৰে শ্ৰী মন্ত শংকৰদেৱ সংঘৰ লগত জৰিত। তেওঁ মানসিকভাৱে ভাঙি পৰিছিল আৰু চুইচাইড কৰিবলৈ চেষ্টা কৰিছিল। সৌভাগক্ৰমে আমি তেওঁক বচালো।‘

উল্লেখযোগ্য যে, যোৱা ৪ জুনৰ দিনা কমলপুৰ প্ৰাথমিকে সাধাৰণ সভা অনুষ্ঠিত কৰি বৰাৰ ঘৰখন এঘৰীয়া কৰাৰ সিদ্ধান্ত লৈছিল আৰু যোৱা ২৬ জুনৰ দিনা লিখিতভাৱে তেওঁলোকক প্ৰাথমিকে বহিস্কাৰ কৰা বুলি জনাইছিল।

ইপিনে, এই কথা ছ’চিয়েল মিডিয়াত ভাইৰেল হৈ পৰাত এতিয়া সকলোৱে সমালোচনাৰ লক্ষ্য কৰি লৈছে শ্ৰীমন্ত শংকৰদেৱ সংঘক। সকলোৰে এটা প্ৰশ্ন ‘ব্ৰয়লাৰ খাব পাৰি, পুহিব নোৱাৰি বা পোহাটো অপৰাধ নেকি? বা শ্ৰীমন্ত শংকৰদেৱ সংঘই পৰিয়ালটোক অন্য উপাৰ্জনৰ পথ দিলে নে?’

আন এজনে ফেইচবুকত লিখিছে এইদৰে ‘বহিঃৰাগতই আহি পথাৰ বজাৰ দখল কৰিলে আৰু আমাৰ এচামে এঘৰীয়া দুঘৰীয়া কৰি মৰি আছে, কিয় মানে, কিয় এচামৰ এই মানসিকতা এতিয়াও সলনি হোৱা নাই।‘

ইপিনে, এই বিষয়টোৰ সৰৱ চৰ্চা চলাৰ পাছতে ইয়াক লৈ আমাৰ সাংবাদিকৰ আগত প্ৰতিক্ৰিয়া প্ৰকাশ কৰিছে সংঘৰ পদাধিকাৰ কমলাকান্ত গগৈয়ে।

গগৈয়ে কয়, ‘মই ছ’চিয়েল মিডিয়াৰ জৰিয়তে কথাটো গম পাইছো। তদন্ত কৰিব লাগিব। ইতিমধ্যে প্ৰধান সম্পাদকক আচল ঘটনাটোৰ বুজ ল’বলৈ কোৱা হৈছে। তেওঁ খবৰ লৈ মোক জনাব।

তাৎপয্যপূৰ্ণভাৱে অনিৰ্বাণ পাঠক নামৰ সোণাপুৰৰ এগৰাকী শংকৰ সংঘৰ বাপে জনোৱা অনুসৰি ‘শ্ৰীমন্ত শংকৰদেৱ সংঘৰ সংবিধানত ক’তো গাহৰি বা ব্ৰইলাৰ পুহিব নোৱাৰিব বুলি উল্লেখ নাই। আমাৰ তাত প্ৰায়সংখ্যক সংঘৰ সংগী ভকতৰ ব্ৰইলাৰ ফার্ম আছে।’