৩১ জুলাইত কাৰ্যকাল অন্ত পৰিব সৌৰভ গাংগুলীৰ; অধ্যক্ষ হ’ব নেকি আই চি চিৰ?

শশাংক মনোহৰে পদত্যাগ কৰাৰ পিছৰে পৰা আই চি চিৰ অধ্যক্ষ পদত সৌৰভ গাংগুলী অধিষ্ঠিত হ’ব বুলি চৰ্চা চলি থকাৰ মাজতে এই সন্দৰ্ভত তাৎপৰ্যপূৰ্ণ বক্তব্য আগবঢ়াইছে গাংগুলীয়ে।

গাংগুলীয়ে কয় যে আই চি চিৰ অধ্যক্ষ হ’বলৈ তেওঁৰ হাতত যথেষ্ট সময় আছে। প্ৰাক্তন অধিনায়ক গৰাকীয়ে বি চি চি আইৰ নিৰ্ণয়তে তেওঁৰ ভৱিষ্যত নিৰ্ভৰ কৰিব বুলি মন্তব্য কৰে।

গাংগুলীয়ে এটা সাক্ষাৎকাৰত কয়, ‍‘মই দৌৰাদৌৰি কৰা নাই। মোৰ বয়স এতিয়াও কম আৰু এই দায়িত্ব আপুনি সদাই কৰি থাকিব নোৱাৰে। এই ধৰণৰ দায়িত্ব জীৱনত এবাৰহে কৰে’।

তেওঁ লগতে কয়, ‍‘খেলৰ সন্দৰ্ভত মই বেলেগৰ তুলনাত অলপ বেছি জানিম, কিয়নো মোৰ জীৱনৰ অধিকতম সময় খেলিয়েই কটাইছো’।

উল্লেখ্য যে সৌৰভ গাংগুলীয়ে ২০১৯ চনৰ অক্টোবৰত ৯ মাহৰ বাবে বি চি চি আইৰ অধ্যক্ষ পদত অধিষ্ঠিত হৈছিল। তেওঁৰ কাৰ্যকাল ৩১ জুলাইত অন্ত পৰিব।

বি চি চি আইৰ সংবিধান অনুসৰি সৌৰভ গাংগুলী কুলিং অফ পিৰিয়ডত যাব।

সংবিধান অনসৰি কোনো ব্যক্তিয়ে একেৰাহে ৬ বছৰ ধৰি ক্ৰিকেট ব’ৰ্ডৰ সৈতে জৰিত হৈ থাকিব নোৱাৰে। ৬ বছৰ হোৱাৰ পিছত ব্যক্তিগৰাকী ৩ বছৰৰ বাবে কোনোধৰণ্‌ ব’ৰ্ডৰ সৈতে জৰিত হ’ভ নোৱাৰে।

গাংগুলীয়ে বি চি চি আইৰ‌ অধ্যক্ষ হোৱাৰ পূৰ্বে ৫ বছৰ ৩ মাহ বেংগল ক্ৰিকেট এছ’চিয়েশ্যনৰ অধ্যক্ষ পদত অধিষ্ঠিত আছিল। সেয়ে বি চি চি আই্‌ অধ্যক্ষ হিচাপে তেওঁৰ হাতত ৯ মাহহে সময় আছিল।