Jioত এইবাৰ ৭৩০ কোটি টকা বিনিয়োগ কৰিব আমেৰিকান কোম্পানী Qualcommয়ে

আমেৰিকান কোম্পানী কোৱালকম ভেন্সাৰ্ছ (Qualcomm Ventures) য়ে ৰিলায়েন্স জিঅ’ প্লেটফৰ্মত ৭৩০ কোটি টকা বিনিয়োগ কৰাৰ কথা ঘোষণা কৰিছে।

বিগত তিনিটা মাহত ৰিলায়েন্স জিঅ’ই লাভ কৰা এইটো হৈছে ১৩ সংখ্যক বিনিয়োগ। ইয়াৰ দ্বাৰা জিঅ’ প্লেটফৰ্মক 5G প্লেন আগবঢ়াই নিয়াত সহায়ক হ’ব।

কোৱালকম ভেন্সাৰ্ছ হৈছে কোৱালকম ইংকৰ বিনিয়োগ গোট। এই বিনিয়োগৰ বিনিময়ত কোম্পানীটোৱে জিঅ’ প্লেটফৰ্মত ০.১৫শতাংশ অংশীদাৰিত্ব লাভ কৰিব।

লকডাউন তথা কৰ’না সংকটৰ মাজতে ৰিলায়েন্সত যিদৰে বিনিয়োগ বৃদ্ধি পাইছে সেইটোৱে অৰ্থনৈতিক বিশ্লেষকসকলক আচৰিত কৰি তুলিছে।

এই বিনিয়োগৰ সৈতে ৰিলায়েন্স জিঅ’ প্লেটফৰ্মত মুঠ বিনিয়োগৰ পৰিমান ১১৮,৩১৮.৪৮কোটি টকালৈ বৃদ্ধি পালে।

জিঅ’ প্লেটফৰ্ম আৰু কোৱালকমৰ মাজত হোৱা এই বুজাবুজিয়ে দেশত 5G নেটৱৰ্কৰ আন্ত:গাঁথনি নিৰ্মাণ কৰাত জিঅ’ক সহায় কৰিব।

দুয়োটা কোম্পানীয়ে কেইবাবছৰো ধৰি এই ক্ষেত্ৰখনত কাম কৰি আহিছে।

বিগত তিনি মাহৰ ভিতৰত জিঅ’ প্লেটফৰ্মত বিনিয়োগ কৰাসকলৰ ভিতৰত আছে ইন্টেল,ফে’চবুক, চিলভাৰ লেক, ভিষ্টা ইকুইটি পাৰ্টনাৰ্ছ, জেনেৰেল আটলান্টিক, কেকেআৰ, মুবাডালা, এডিআইএ, টিপিজি, এল কেটেৰটন আৰু পিআইএফ অন্যতম।

ইয়াৰ মাজতে ৰিলায়েন্স ইণ্ডাষ্ট্ৰীজে ঋণমুক্ত হোৱাৰ কথা ঘোষণা কৰিছে। কোম্পানীটোৱে এই লক্ষ্য প্ৰায় ৯মাহ পূৰ্বেই পূৰণ কৰিছে।

আনহাতে, ৰিলায়েন্স ইণ্ডাষ্ট্ৰীজৰ মাৰ্কেট কেপিটেল ইতিমধ্যে ১১লাখ কোটি টকা অতিক্ৰম কৰিছে।