সৰ্বোচ্চ ন্যায়ালয়ৰ ঐতিহাসিক ৰায় : পিতৃ-মাতৃৰ মৃত্যুৰ পিছতো পৈতৃক সম্পত্তিৰ সমধিকাৰ পাব কন্যা সন্তানে

২০০৫ চনতে দেশত হিন্দু উত্তৰাধিকাৰ (সংশোধিত) আইন, ২০০৫ (Hindu Succession (Amendment) Act,2005) বলৱৎ কৰা হৈছিল।

উক্ত সংশোধিত হিন্দু উত্তৰাধিকাৰ আইন ২০০৫ৰ দ্বাৰা কন্যাকো পৈতৃ সম্পত্তিৰ অধিকাৰিত্ব প্ৰদান কৰা হৈছিল।

কিন্তু উক্ত সংশোধিত আইনত পিতৃ-মাতৃৰ বিয়োগৰ পিছত কন্যা সন্তানে পৈতৃক সম্পত্তিৰ সমান অধিকাৰ লাভ কৰিবনে নাই সেই বিধান দিয়া হোৱা নাছিল।

দেশৰ সর্বোচ্চ ন্যায়ালয়ে আজি হিন্দু উত্তৰাধিকাৰ আইন ২০০৫ৰ অধীনত পিতৃ-মাতৃৰ বিয়োগৰ পিছতো কন্যা সন্তানে পৈতৃক সম্পত্তিৰ সমান অধিকাৰ লাভ কৰিব বুলি ঐতিহাসিক ৰায় প্ৰদান কৰিছে।

উল্লেখ্য যে, ২০১৬ চনত প্ৰকাশ আৰু ফুলৱতী গোচৰত আদালতে পিতৃ-মাতৃৰ বিয়োগৰ পিছত কন্যা সন্তানে পৈতৃক সম্পত্তিৰ সমান অধিকাৰ লাভ নকৰিব বুলি কোৱা হৈছিল।

কিন্তু ২০১৮ চনত পুনৰ অন্য এটা তদ্ৰূপ গোচৰত আদালতে উক্ত আইন কাৰ্যকৰী হ’ব বুলি জনাইছিল।

ইয়াৰ পিছতে হিন্দু উত্তৰাধিকাৰ আইনখনৰ এই বিষয়টো বিবাদমান হৈ ধৰা দিছিল।

আজি বিচাৰপতি অৰুণ মিশ্ৰৰ নেতৃত্বাধীন তিনি সদস্যৰ বিচাৰপীঠে ২০০৫ চনৰ হিন্দু উত্তৰাধিকাৰ আইনৰ ৬ নং ধাৰা অনুযায়ী কন্যা সন্তানৰো পৈতৃক সম্পত্তিৰ ওপৰত সমান অধিকাৰ আছে বুলি ৰায়দান কৰিছে।

ৰায়দানৰ সময়ত বিচাৰপতি অৰুণ মিশ্ৰই কয়, “পৈতৃক সম্পত্তিৰ ওপৰত পুত্ৰ সন্তানৰ সমানে কন্যা সন্তানৰো সমান অধিকাৰ আছে। এইক্ষেত্ৰত সম্পত্তিৰ গৰাকী পিতৃ-মাতৃ জীয়াই থাকক বা নাথাকক সম্পত্তিৰ ওপৰত কন্যা সন্তানৰ আজীৱন অধিকাৰ থাকিব।”

উল্লেখ্য যে হিন্দু উত্তৰাধিকাৰ (সংশোধিত) আইন, ২০০৫ চনৰ ৯ ছেপ্তেম্বৰ বলৱৎ কৰা হৈছিল। সেই সময়ত জীৱিত পিতৃ-মাতৃৰ কন্যা সন্তানেহে উক্ত আইনৰ অধীনত পৈতৃক সম্পত্তিৰ অধিকাৰ লাভ কৰি আহিছিল।

এতিয়াৰ পৰা ২০০৫ চনত বা তাৰ পূৰ্বেও কোনো পিতৃ-মাতৃৰ মৃত্যু হোৱা কন্যা সন্তানে পৈতৃক সম্পত্তিৰ সমান অধিকাৰ লাভ কৰিব।