ভাৰতত কৰ’নাত নতুনকৈ প্ৰায় ৬৫হাজাৰ আক্ৰান্ত; ২৪ঘন্টাত ১০০৭জনৰ মৃত্যু

বিগত ২৪ ঘন্টাত ভাৰতত মুঠ ৬৪,৫৫৩জন লোক নতুনকৈ কোভিড-১৯ত আক্ৰান্ত হৈছে। আনহাতে, এই সময়ছোৱাত নতুনকৈ ১০০৭জন লোকৰ কোভিড-১৯ত মৃত্যু হৈছে।

দেশত এতিয়া মুঠ কোভিড-১৯ত আক্ৰান্ত ৰোগীৰ সংখ্যা ২৪,৬১,১৯১জনলৈ বৃদ্ধি পাইছে। সেইদৰে মুঠ মৃতকৰ সংখ্যা হৈছেগৈ ৪৮,০৪০জন।

আনহাতে, বৰ্তমান সক্ৰিয় ৰোগীৰ সংখ্যা হৈছে ৬,৬১,৫৯৫জন আৰু ১৭,৫১,৫৫৬জন ৰোগীয়ে আৰোগ্য লাভ কৰিছে।

শুকুৰবাৰে কেন্দ্ৰীয় স্বাস্থ্য মন্ত্ৰ্যালয়ে এই তথ্য সদৰী কৰিছে।

বৰ্তমান মুঠ কোভিড-১৯ত আক্ৰান্তৰ সংখ্যাৰ ফালৰ পৰা ভাৰত বিশ্বৰ তৃতীয় স্থানত আছে। ভাৰতৰ আগত আছে আমেৰিকা আৰু ব্ৰাজিল।

দেশত কৰ’নাৰ পৰা আৰোগ্য লাভ কৰা ৰোগীৰ সংখ্যা প্ৰতিদিনে বৃদ্ধি পোৱালৈ চাই কেন্দ্ৰীয় স্বাস্থ্য মন্ত্ৰ্যালয়ে সামগ্ৰিকভাৱে দেশৰ কৰ’না পৰিস্থিতিৰ উন্নতি ঘটা বুলি দাবী কৰিছে।

ইপিনে, ভাৰতত আৰোগ্যৰ হাৰ ৭০শতাংশতকৈয়ো অধিক আৰু কোভিডত মৃত্যুৰ হাৰ ১.৯৫শতাংশ যিটো বিশ্বৰ তুলনাত ন্যুনতম।

কেন্দ্ৰীয় চৰকাৰে কৰ’নাৰ সংক্ৰমণ নিয়ন্ত্ৰণৰ বাবে অধিক পৰীক্ষাৰ প্ৰতি আগ্ৰহী। সেই অনুসৰি, প্ৰতিদিনে ১০ লাখ নমুনা পৰীক্ষা কৰাৰ লক্ষ্য নিৰ্দ্ধাৰণ কৰা হৈছে।