‘দক্ষিণ চীনৰ তিব্বতৰ এক অঞ্চল হৈছে অৰুণাচল প্ৰদেশ’ : চীনৰ বৈদেশিক মুখপাত্ৰৰ দাবী

ভাৰত-চীন সীমান্তৰ অৰুণাচল প্ৰদেশৰ মোক মোহন লাইনৰ পৰা চীনৰ পিপ’লছ লিবাৰেশ্যন আৰ্মি(পিএলএ)এ অপহৰণ কৰি নিয়া পাঁচ অপহৃত ব্যক্তিৰ সন্দৰ্ভত দিল্লীয়ে বেইজিঙৰ সৈতে যোগাযোগ কৰিছিল।

কিন্তু ইয়াৰ প্ৰত্যুত্তৰত বেইজিঙে দিল্লীক জনায় যে সেই পাঁচজন ব্যক্তিৰ বিষয়ে কোনো তথ্য বেইজিঙৰ হাতত নাই।

ইফালে চীনৰ বৈদেশিক মন্ত্ৰালয়ৰ মুখপত্ৰ ঝাও লিজিয়ানে কয়, “কেতিয়াও চীনে তথাকথিত অৰুণাচল প্ৰদেশক স্বীকৃতি দিয়া নাই। অৰুণাচল হৈছে দক্ষিণ চীনৰ তিব্বতৰ অঞ্চল। এই অঞ্চলত অপহৃত পাঁচজন ভাৰতীয়ৰ সন্দৰ্ভত ভাৰতীয় সেনা বাহিনীয়ে পিএলএৰ দ্বাৰা আমালৈ প্ৰশ্ন কৰা বা বাৰ্তা পঠোৱাৰ কোনো বিৱৰণ তথা তথ্য আমাৰ হাতত নাই।”

চীনৰ বৈদেশিক মন্ত্ৰালয়ৰ এই উত্তৰ পিছতে ভাৰত চৰকাৰে তীব্ৰ প্ৰতিক্ৰিয়া প্ৰকাশ কৰিছে।

উল্লেখ্য যে ইয়াৰ পূৰ্বে কেন্দ্ৰীয় ক্ৰীড়া আৰু যুৱ কল্যাণ মন্ত্ৰী কিৰেণ ৰিজিজুৱে জনাইছিল যে ভাৰতীয় সেনাই পাঁচগৰাকী অৰুণাচলী যুৱক অপহৰণ তথ্য বিচাৰি চীনৰ পিএলএ-লৈ এক বাৰ্তা প্ৰেৰণ কৰিছিল।

ইফালে চীনৰ বৈদেশিক মন্ত্ৰালয়ৰ মুখপাত্ৰৰ এই প্ৰত্যুত্তৰক ‘এই প্ৰতিক্ৰিয়া প্ৰতীক্ষিত’ বুলি মন্তব্য কৰিছে কেন্দ্ৰীয় মন্ত্ৰী কিৰেণ ৰিজিজুৱে।

ইফালে প্ৰাক্তন কংগ্ৰেছী সাংসদ নিনং এৰিঙে সীমান্ত অঞ্চলৰ পৰা পাঁচজন ভাৰতীয় নাগৰিকক চীনৰ সেনা বাহিনীয়ে অপৰহণ কৰিছে বুলি পুনৰ এবাৰ সংবাদ মাধ্যমৰ আগত দাবী কৰিছে।

স্মৰ্তব্য যে, যোৱা বৃহস্পতিবাৰে মোক মোহন লাইনৰ পৰা তুচ সিংকোম, টানা বাকেৰ, প্ৰসাদ ৰিংলিং, নাগৰু দিৰি আৰু দংটু এবিয়া নামৰ ১৮ৰ পৰা ২০ বছৰীয়া পাঁচজন যুৱকক চীনৰ সেনা বাহিনীয়ে অপহৰণ কৰি নিয়া বুলি ভাৰতে দাবী কৰি আহিছে।