আজি আই পি এলত আন এক অভিলেখৰ গৰাকী হ’ব মহেন্দ্ৰ সিং ধোনী

আজি আই পি এলৰ এখন গুৰুত্বপূৰ্ণ মেচত ৰাজস্থানৰ বিৰুদ্ধে অৱতীৰ্ণ হ’ব চেন্নাই ছুপাৰ কিংছ। মেচখন আৰম্ভ হোৱাৰ লগে লগে চেন্নাইৰ অধিনায়ক মহেন্দ্ৰ সিং ধোনীৰ নামত লিপিবদ্ধ হ’ব এক অনন্য অভিলেখ।

এম এছ ধোনী আই পি এল ইতিহাসৰ সবাটোকৈ অধিক মেচত অংশ লোৱা খেলুৱৈত পৰিণত হ’ব আৰু আজি তেওঁ আই পি এল কেৰিয়াৰৰ ২০০ সংখ্যক মেচত অংশ ল’ব।

আই পি এলৰ আৰম্ভণি ছিজনৰ পৰা এই পৰ্যন্ত প্ৰতিটো ছিজনতে অংশ লোৱা ধোনীয়ে আজি ৰাজস্থানৰ বিৰুদ্ধে ঐতিহাসিক মেচখন খেলিব।

আই পি এল ইতিহাসত সৰ্বাধিক ৰান কৰা দহগৰাকী ক্ৰিকেটাৰৰ তালিকাত সন্নিৱিষ্ট আছে এম এছ ধোনীৰ নাম। তেওঁ এই পৰ্যন্ত ১৯৯ খন খেলত অংশ লৈ ৪৫৬৮ ৰান সংগ্ৰহ কৰিছে।

আই পি এলত ধোনীয়ে শতক অৰ্জন কৰিবলৈ সক্ষম হোৱা নাই যদিও কেইবাটাও দৰ্শনীয় ইনিংছেৰে নিজৰ দলক জয়ী কৰোৱাত গুৰুত্বপূৰ্ণ ভূমিকা গ্ৰহণ কৰিছে।

ধোনী নেতৃত্বাধীন চেন্নাই ছুপাৰ কিংছ দলে চলিত বৰ্ষত সন্তোষজনক প্ৰদৰ্শন আগবঢ়োৱাত ব্যৰ্থ হৈছে যদিও তেওঁৰ নেতৃত্বতে দলে তিনিবাৰকৈ আই পি এলৰ খিতাপ দখল কৰিছে।

উল্লেখ্য যে চলিত ছিজনৰ প্লে অফত স্থান সুৰক্ষিত কৰিবলৈ হ’লে চেন্নাই দলে বাকী থকা পাঁচখন মেচৰ গোটেই কেইখনতে বিজয় সাব্যস্ত কৰিব লাগিব।