প্ৰধানমন্ত্ৰী মোদীৰ নতুন শ্ল’গান “লোকেল ফ’ৰ দেৱালী” : দেৱালীত দেশীয়ভাৱে উৎপাদিত সামগ্ৰী ক্ৰয়ৰ আহ্বান

প্ৰধানমন্ত্ৰী নৰেন্দ্ৰ মোদীয়ে তেওঁৰ শ্ল’গান ‘ভ’কেল ফ’ৰ লোকেল’ক দেশৰ জনগণক দেৱালীত সুপ্ৰয়োগ কৰিবলৈ আহ্বান জনাইছে।

প্ৰধানমন্ত্ৰীয়ে ‘ভ’কেল ফ’ৰ লোকেল’ শ্ল’গানৰ অধীনত দেশৰ জনগণক এইবাৰ দেৱালীক ‘লোকেল ফ’ৰ দেৱালী’ হিচাপে উদযাপন কৰিবলৈ আহ্বান জনাইছে।

দেশীয়ভাৱে উৎপাদিত সামগ্ৰী ক্ৰয় কৰি দেশৰ জনগণক দেৱালী উদযাপনৰ আহ্বান জনায় সোমবাৰে প্ৰধানমন্ত্ৰী নৰেন্দ্ৰ মোদীয়ে ‘লোকেল ফ’ৰ দেৱালী’ নতুন শ্ল’গান আওৰায়।

দেশৰ জনগণক দেৱালীৰ শুভেচ্ছা জ্ঞাপন কৰি এক ভিডিঅ’ কনফাৰেন্সিঙৰ যোগেদি প্ৰধানমন্ত্ৰীয়ে কয় “মই ভাবো যে বাৰাণাসীৰ লগতে দেশৰ জনসাধাৰণে ‘লোকেল ফ’ৰ দেৱালী’ক প্ৰচাৰ কৰাৰ লগতে উৎসাহ জনোৱা এয়াই হৈছে ডাঙৰ সুযোগ।”

যেতিয়া দেশৰ জনগণে গৰ্বৰে নিজ দেশত উৎপাদিত সামগ্ৰী ক্ৰয় কৰিব, দেশত উৎপাদিত সামগ্ৰীৰ বিষয়ে কথা পাতিব, মাত দিব তেতিয়া আমাৰ উৎপাদিত সামগ্ৰীসমূহৰ বিষয়ে বাহিৰলৈ বাৰ্তা যাব বুলিও প্ৰধানমন্ত্ৰী মোদীয়ে মন্তব্য কৰে।

“কেৱল দেশীয় পৰিচয়কে শক্তিশালী কৰিব তেনে নহয়, ইয়ে স্থানীয় নিৰ্মাতাসকলৰ দেৱালীও অধিক উজ্জ্বল কৰি তুলিব।” প্ৰধানমন্ত্ৰীয়ে লগতে কয়।