অসমৰ বিশিষ্ট কবি সমীৰ তাঁতী আৰু অজিত বাইৰীক সম্বৰ্ধনা জ্ঞাপন কৰিব মুম্বাইৰ ৰামনাথ ভট্টাচাৰ্য ফাউণ্ডেশ্যনে

“অসমীয়া কবিতা জগতত আগবঢ়োৱা অৱদানৰ বাবে সমীৰ তাঁতী আৰু বাংলা ভাষাৰ কবিতাৰ ক্ষেত্ৰত অজিত বাইৰীক মুম্বাইস্থিত ৰামনাথ ভট্টাচাৰ্য ফাউণ্ডেশ্যনে অহা ১৮ মাৰ্চত সন্ধিয়া ৫ বজাত মহানগৰৰ স্বামী বিবেকানন্দ কেন্দ্ৰত সম্বৰ্ধনা জনাৱ।” দেওবাৰে গুৱাহাটী প্ৰেছ ক্লাবত অনুষ্ঠিত এখন সংবাদমেল যোগে ফাউণ্ডেশ্যনৰ সাধাৰণ সচিব শ্যামাশিস ভট্টাচাৰ্যই এই কথা অৱগত কৰে।

তেওঁ লগতে কয়, “এই দুগৰাকী কবিক বিশিষ্ট বুৰঞ্জী গৱেষক পদ্মনাথ বিদ্যা বিনোদ আৰু ভাৰতৰ স্বাধীনতা আন্দোলনৰ সৈতে জড়িত থকা তথা ভূ-পৰ্যটক ৰামনাথ বিশ্বাসৰ স্মৃতিত বঁটা প্ৰদান কৰা হ’ব।”

এই বঁটাৰ সৈতে নগদ ৫১,০০০ টকা, এটি স্মাৰক আৰু এখন মুগা উত্তৰীয় থাকিব বুলি তেওঁ জানিবলৈ দিয়ে।

আজিৰ সংবাদমেলত মেলত তেওঁ প্ৰয়াত ৰামনাথ ভট্টাচাৰ্য সন্দৰ্ভত কয়, “তেওঁ হিন্দী ধাৰাবাহিক নিৰ্মাতা শকুন্তলম টেলিফিল্মছৰ কৰ্ণধাৰ আছিল। লগতে তেওঁ বাংলা ভাষাৰ এজন প্ৰতিষ্ঠিত কবি তথা সংস্থাৰ প্ৰতিষ্ঠাপক সভাপতি আছিল।”

আনহাতে তেওঁ পদ্মনাথ বিদ্যাবিনোদ আৰু ৰামনাথ বিশ্বাস সন্দৰ্ভত কয়, “এই দুগৰাকী মহান ব্যক্তি প্ৰয়াত ৰামনাথ ভট্টাচাৰ্যৰ পূৰ্বপুৰুষ আছিল। এই দুজন ব্যক্তিৰ নামত ২০১০ চনৰে পৰা আমি এগৰাকী অসমীয়া তথা এগৰাকী বাংলাভাষী কবিক সম্বৰ্ধনা জনাই আহিছো।”

তদুপৰি, সেই সম্বৰ্ধনা অনুষ্ঠানতে লেখিকা মুক্তি চৌধুৰীয়ে বঁটা বিতৰণী উপলক্ষে প্ৰস্তুত কৰি উলিওৱা স্মাৰকগ্ৰন্থখনিও উন্মোচন কৰিব বুলি তেওঁ জানিবলৈ দিয়ে।