নতুন প্রজন্মক জননেতা ভীমবৰ দেউৰীৰ আদৰ্শক গ্ৰহণ কৰিবলৈ মুখ্যমন্ত্ৰী সোণোৱালৰ আহ্বান

অসমৰ নতুন প্ৰজন্মক জননেতা ভীমবৰ দেউৰীৰ আদৰ্শক অনুসৰণ কৰিবলৈ আহ্বান জনাইছে মুখ্যমন্ত্ৰী সৰ্বানন্দ সোণোৱালে। লখিমপুৰ জিলাৰ নাৰায়ণপুৰ উচ্চতৰ মাধ্যমিক বিদ্যালয়ৰ খেলপথাৰত উদযাপন কৰা জননেতা ভীমবৰ দেউৰীৰ ৭৩ সংখ্য মৃত্যু দিৱসত প্ৰদান কৰাৰ ভাষণত মুখ্যমন্ত্ৰী সোণোৱালে এইদৰে কয়।

লখিপুৰ জিলা প্ৰশাসন, দেউৰী স্বায়ত্ত শাসিত পৰিষদ আৰু সদৌ অসম দেউৰী ছাত্ৰ সন্থাৰ সহযোগত অসম চৰকাৰৰ সাংস্কৃতিক সঞ্চালকালয়ে আয়োজন কৰা জননেতা ভীমবৰ দেউৰীৰ ৭৩ সংখ্যক মৃত্যু দিৱসৰ আজিৰ কাৰ্যসূচীত মুখ্য অতিথি হিচাপে উপস্থিত থাকি মুখ্যমন্ত্ৰী সোণোৱালে লগতে আৰু কয় যে ভাৰতৰত্ন গোপীনাথ বৰদলৈৰ সৈতে স্বাধীনতা সংগ্ৰামী জননেতা ভীমবৰ দেউৰীয়ে লগ লাগি ব্ৰিটিছৰ শাসনকালতে আধুনিক অসমৰ বুনিয়াদ নিৰ্মাণ কৰিছিল।

অতি ভিতৰুৱা তথা পিছপৰা অঞ্চলৰ পৰা কঠোৰ পৰিশ্ৰম আৰু ঈৰ্ষণীয় মেধাৰ বলেৰে ওলাই আহি অসমৰ এজন জননেতা হিচাপে প্ৰতিষ্ঠান লাভ কৰা ভীমবৰ দেউৰীৰ শিক্ষা জীৱনৰ বিষয়ে উল্লেখ কৰি তেওঁ নতুন প্ৰজন্মৰ প্ৰেৰণাৰ উৎস বুলিও অভিহিত কৰে। নতুন প্ৰজন্মক জননেতা ভীমবৰ দেউৰীক অনুসৰণ কৰিবলৈও মুখ্যমন্ত্ৰীয়ে আহ্বান জনায়।

ইফালে মুখ্যমন্ত্ৰীয়ে প্ৰধানমন্ত্ৰীৰ আত্মনিৰ্ভৰ শ্ল’গান আওৰাই অসম চৰকাৰে প্ৰাথমিক স্তৰৰ পৰাই শিক্ষাৰ্থীসকলৰ বাবে নামভৰ্তিৰ মাচুল ৰেহাই দিয়াৰ লগতে বিনামূলীয়া পাঠ্যপুথি যোগান, ইউনিৰ্ফম প্ৰদান, হোষ্টেল মাচুল ৰেহাই দি আহিছে বুলিও উল্লেখ কৰে।

উজনি অসমৰ শদিয়াত জননেতা ভীমবৰ দেউৰীৰ স্মাৰক ক্ষেত্ৰৰ প্ৰকল্প নিৰ্মাণ কৰা হ’ব বুলিও মুখ্যমন্ত্ৰী সৰ্বানন্দ সোণাৱোলে লগতে ঘোষণা কৰে। ইফালে এই প্ৰকল্পৰ কাম লেহেমীয়া হোৱাৰ বাবে পূৰ্ব কংগ্ৰেছ চৰকাৰকহে দোষাৰূপ কৰে মুখ্যমন্ত্ৰী সোণোৱালে।

উল্লেখ্য যে অসম চৰকাৰৰ সাংস্কৃতিক সঞ্চালকালয়ে যোৱা বৰ্ষৰ পৰা জননেতা ভীমবৰ দেউৰীৰ মৃত্যুৰ ৩০ নৱেম্বৰৰ দিনটোক ‘ভীমবৰ দেউৰী দিৱস’ হিচাপে পালন কৰি আহিছে।

সাংস্কৃতিক সঞ্চালকালয়ৰ সঞ্চালক বিষ্ণু কমল বৰাই আদৰণি ভাষণেৰে আৰম্ভ হোৱা আজিৰ ভীমবৰ দেউৰী দিৱস অনুষ্ঠানত পঞ্চায়ত আৰু গ্ৰামোন্নয় মন্ত্ৰী নৱ কুমাৰ দলে, তেজপুৰ লোকসভা সমষ্টিৰ সাংসদ পল্লৱলোচন দাস, বিহপুৰীয়া বিধানসভা সমষ্টিৰ বিধায়ক দেৱানন্দ হাজৰিকা, প্ৰাক্তন মন্ত্ৰী প্ৰেমানন্দ বৰা, দেউৰী স্বায়ত্ত শাসিত পৰিষদৰ মুখ্য কাৰ্যবাহী সদস্য মাধৱ দেউৰী, মাধৱদেৱ বিশ্ববিদ্যালয়ৰ উপাচাৰ্য ডঃ দিবাকৰ ডেকা আৰু লখিমপুৰ জিলাৰ উপায়ুক্ত ডঃ জীৱন বি-এ উপস্থিত থাকি ভাষণ প্ৰদান কৰে।