মৰ্মান্তিক! কেন্সাৰত ঘৰৰ ডাঙৰ সন্তানৰ মৃত্যু; শোক সহিব নোৱাৰি গণ-আত্মহত্যা পৰিয়ালৰ

এটা মৃত্যু আৰু ইয়াৰ লগে লগে যৱনিকা পৰিল এটা পৰিয়ালৰ। পৰিয়ালৰ এগৰাকী সদস্যৰ মৃত্যুৰ বেদনা সহিব নোৱাৰি গোটেই পৰিয়ালটোৱে ল’লে জীৱনৰ এই চৰম সিদ্ধান্ত। এনে নিয়তিৰ নিষ্ঠুৰ পৰিহাস দেখি সকলোৱেই স্তম্ভিত।

এনেয়ে সন্তান হেৰুৱাৰ দুখ বৰ কঠিন। তাতেই অকাল মৃত্যু আৰু সেয়াও বাঢ়ি অহা বয়সৰ সময়ত। নাই, নোৱাৰিলে সহ্য কৰিব এনে সন্তানদৰে সন্তান হেৰুৱাৰ দুখ।

তামিলনাডুৰ চালেম চহৰত এটা পৰিয়ালত সংঘটিত হৈছে এনে নিদাৰুণ ঘটনা।

কেন্সাৰত আক্ৰান্ত হৈ ঘৰৰ ডাঙৰ ল’ৰাৰ মৃত্যুৰ পাছৰে পৰা ভাঙি পৰিছিল পিতৃ-মাতৃ। তিনিমাহ ধৰি ভীষণ অন্তৰ্দ্বন্দ্বত পৰাজয় স্বীকাৰ কৰি অৱশেষত মৃত্যুৱেই অন্তিম পথ বুলি ধৰি ল’লে তেওঁলোকে।

সেয়েহে, সকলো পাহৰি যোৱাৰ পথ বিচাৰি আন দুগৰাকী নাবালক সন্তানৰ সৈতে ঘৰতে থকা কীটনাশক পান কৰি গণ-আত্মহত্যাৰ কৰিলে দুৰ্ভগীয়া পৰিয়ালটোৱে।

ৰাজ্যখনৰ আম্মাপেট থানাৰ অন্তৰ্গত পন্নমপেটম অঞ্চলৰ এটা ঘৰৰ পৰা সোমবাৰে আৰক্ষীয়ে উদ্ধাৰ কৰে মুৰুগান পৰিয়ালৰ চাৰিগৰাকী সদস্যৰ নিথৰ দেহ। মৃতক কেইজনৰ নাম হৈছে ভি মুৰুগান(৩৮), পত্নী গোকিলা(৩৫) আৰু দুই পুত্ৰ কাৰ্তিক (১২) আৰু বসন্ত কুমাৰ(১৫)।

গোটেই দিন পৰিয়ালটোৰ কোনো সাৰ-সুৰ নোপোৱাত এগৰাকী চুবুৰীয়াই খিৰিকিৰে ঘৰৰ ভিতৰত জুমি চাইছিল। মজিয়াৰ ওপৰত চাৰিগৰাকীৰে নিথৰ দেহ পৰি থকা দেখি সন্দেহ হয় ব্যক্তিগৰাকীৰ। থানাত খৱৰ দিয়াৰ পাছত আৰক্ষী আহি দুৱাৰ ভাঙি সন্তান দুগৰাকীৰ সৈতে পিতৃ-মাতৃৰ মৃতদেহ উদ্ধাৰ কৰে।

ইপিনে, এই ঘটনাৰ খৱৰ পোৱাৰ পাছতেই স্থানীয় আৰক্ষীৰ সৈতে ঘটনাস্থলীলৈ যায় আৰক্ষীৰ আইন-শৃংখলা শাখাৰ ডিচিপি চন্দ্ৰশেখৰণ। তেওঁৱেই তদন্তৰ ভাৰো নিজেই গ্ৰহণ কৰিছে।

মৃতদেহকেইটা মৰণোত্তৰ পৰীক্ষাৰ বাবে প্ৰেৰণ কৰা হয়। আৰক্ষীয়ে ঘটনাস্থলীৰ পৰা কোনো আত্মহত্যাৰ টোকা বিচাৰি পোৱা নাই।

আৰক্ষীৰ প্ৰাথমিক তদন্ত অনুসৰি জানিব পৰা গৈছে যে সেই দম্পতিৰ তিনিগৰাকী সন্তান। ডাঙৰ সন্তান মদন কুমাৰৰ(১৭) কেন্সাৰৰ সৈতে যুঁজ দি তিনিমাহ পূৰ্বে মৃত্যু হয়। ইয়াৰ পাছৰে পৰা সেই পিতৃ-মাতৃ শোকত মানসিকভাৱে ভাঙি পৰিছিল।