চিকনি বৰহোলা উচ্চ মাধ্যমিক বিদ্যালয়ত আই পাছ ডেভেলপমেন্ট ফাউণ্ডেশ্যনৰ সজাগতা সভা

কলিয়াবৰৰ চিকনি বৰহোলা উচ্চ মাধ্যমিক বিদ্যালয়ত শনিবাৰে নৱম আৰু দশম শ্ৰেণীৰ ছাত্ৰী সকলক “আই পাছ ডেভেলপমেন্ট ফাউণ্ডেশ্যন” এন জি অ’ৰ তৰফৰ পৰা “মাহেকীয়া ঋতুস্ৰাৱৰ সময়ত হ’ব পৰা সাধাৰণ অসুবিধা তথা যৌন আৰু প্ৰজনন স্বাস্থ্যকেন্দ্ৰিক বিভিন্ন সমস্যা সমূহৰ পৰা পৰিত্ৰাণ পোৱাৰ উপায় সমূহৰ” সম্পৰ্কত এখন সজাগতা সভা অনুষ্ঠিত হয়।

উক্ত সভাত “আই পাছ ডেভেলপমেন্ট ফাউণ্ডেশ্যন”ৰ বিষয়ববীয়াৰ লগতে চিকনি বৰহোলা উচ্চ মাধ্যমিক বিদ্যালয়ৰ প্ৰধান শিক্ষক তথা বিষয়া-কৰ্মচাৰী সকল উপস্থিত থাকে।

এই সজাগতা অনুষ্ঠানত ছাত্ৰী সকলক মাহেকীয়া ঋতুস্ৰাৱৰ সময়ত হ’ব পৰা সাধাৰণ অসুবিধা তথা যৌন আৰু প্ৰজনন স্বাস্থ্যকেন্দ্ৰিক বিভিন্ন সমস্যা সমূহৰ বিষয়ে আলোচনা তথা সমাধানৰ বিভিন্ন ধৰণৰ পৰামৰ্শ আগবঢ়াই আই পাছ ডেভেলপমেন্ট ফাউণ্ডেশ্যন”ৰ বিষয়ববীয়া সকলে।

লগতে প্ৰথম মাহেকীয়া হোৱা সময়ত লব লগা যতনৰ লগতে মাহেকীয়া ঋতুস্ৰাৱৰ সময়ত এগৰাকী নাৰীয়ে লব লগা যতন আৰু পুষ্টিকৰ খাদ্য গ্ৰহণৰ বিষয়েও অৱগত কৰে।

আনহাতে, পুৰণি দিনীয়া কিছু ৰীতি-নীতিৰ প্ৰচলন বন্ধ কৰি বৈজ্ঞানিক দৃষ্টিভংগী গ্ৰহণ কৰি নিজৰ স্বাস্থ্যৰ প্ৰতি যতন লোৱাৰ ক্ষেত্ৰত মনোনিবেশ কৰিবলৈ ছাত্ৰী সকলক পৰামৰ্শ আগবঢ়ায়। লগতে মাহেকীয়া ঋতুস্ৰাৱৰ সময়ত প্ৰতিগৰাকী নাৰীকে চেনিটাৰী নেপকিন ব্যৱহাৰ কৰিবলৈও পৰামৰ্শ আগবঢ়াই আই পাছ ডেভেলপমেন্ট ফাউণ্ডেশ্যন”ৰ বিষয়ববীয়া সকলে।

তদুপৰি, ছাত্ৰী সকলৰ বিভিন্ন ধৰণৰ নাৰীজনীত সমস্যাৰ বিষয়ে চিকিৎসকৰ লগত আলোচনা কৰিব পৰাকৈ কলিয়াবৰৰ জখলাবন্ধা চিকিৎসালয়ৰ প্ৰসূতি বিভাগৰ চিকিৎসকৰ লগত মত বিনিময় কৰিব পৰাকৈ বিশেষ সুবিধা প্ৰদান কৰে আই পাছ ডেভেলপমেন্ট ফাউণ্ডেশ্যন”ৰ বিষয়ববীয়া সকলে।

অৱশ্যে আই পাছ ডেভেলপমেন্ট ফাউণ্ডেশ্যন”ৰ বিষয়ববীয়া সকলে উক্ত সজাগতা অনুষ্ঠানটিৰ অন্তত ছাত্ৰী সকলৰ লগত নিজাববীয়াকৈ মত বিনিময় কৰি বিভিন্ন সমস্যা সমূহৰ সমাধান পথ নিৰ্দেশ কৰে।